Kepala Menteri deka mantaika berita manah ti bekaul enggau pejalai Bekal Ai Grid Sarawak
LAWAS: Kepala Menteri Datuk Patinggi Abang Johari Tun Abang Openg melaba deka mantaika siti agi berita manah ungkup rayat nengeri tu kena Oktoberi taun tu bekaul enggau pejalai Bekal Ai Grid Sarawak.
Iya madah nengah pejalai projek Bekal Ai Grid nya penanggul bekal ai ke nyadi ba sekeda endur di nengeri tu deka teputar.
“Rayat patut bela besampi nyema iya mujur dipejalai kena bulan 10 (Oktober) ila perintah deka ngemansangka Bekal Ai Grid Sarawak beungkus RM 8 billion,” ku iya rambau Pengerami Ngengkahka Batu Pemun ba Palan Penyulut Sarawak (Centexs) ditu kemari.
Sama bisi datai Sapit Kepala Menteri Datuk Amar Awang Tengah Ali Hasan enggau bini iya, Datuk Dayang Morliah Datuk Awang Daud, Speaker DUN Sarawak Datuk Amar Mohamad Asfia Awang Nassar, Sapit Menteri KPDNKK Malaysia, Datuk Henry Sum Agong, Menteri Muda Pengawa Betanam Betupi Dr Abdul Rahman Ismail, ADUN Batu Danau Paulus Palu
Rayat patut bela besampi nyema iya mujur dipejalai kena bulan 10 (Oktober) ila perintah deka ngemansangka Bekal Ai Grid Sarawak beungkus RM 8 billion. Datuk Patinggi Abang Johari Tun Abang Openg Kepala Menteri Sarawak
Gumbang, Sekretari Perintah Nengeri Tan Sri Datuk Amar Mohamad Morshidi Abdul Ghani enggau penyandang penuduk Parlimen Limbang Hasbi Habibollah.
Ngelansa senyang penanggul bekal ai ba pelilih Lawas, urung RM169.4 juta diagih dikena ngemansangka bekal ai ba Lawas ungkup timpuh dua taun.
Nengah agih belanja nya ku iya sitak Punang, Merapok enggau Trusan di pelilih tu nadai napi penanggul ai.
Berebak enggau nya ku iya, Sarawak benung chakah ngemansangka luasa altenatif ke ulih dikena baru nengah pansik enggau ngena teknologi baru.
Iya madah pengawa tu nyengkaum pengawa meresa pengawa ngena apilikasyen sel minyak hidrogen ba sektor pengangkut, kuasa eletrik baru, nyungkak pejalai transformasyen enggau nyadi chunto ba renggat dunya dalam nyendiaka bekal elektrik ngagai sitak menua pesisir nengah chara nguna kuasa ke beresi.
“Ambika chunto, dudi hari ila, landskap perengka pengangkut mensia mayuh di Sarawak deka belinsur manah agi iya nya ngena bas ke nguna kuasa elektrik.
“Atur pemadu beguna iya nya ngerembaika kategori bas tu ungkup nguna kuasa hidrogen, ke lalu nempa Kuching nyadi mengeri besai keterubah ba menua tu ke bisi ngembuan bas baka nya nyadi projek pemungkal,”ku iya.