300 ruang bilik dibantu nengah program ‘Selami Kasih’ YKN 2018

KUCHING: Sepenyampau 300 ruang bilik di sitak Parlimen Batang Lupar nerima pemaik ari program ‘Selami Kasih’ YKN 2018 diatur Yayasan Pengintu Pengelantang Menua (YKN) ti udah diatur apin lama ke udah.

Nitih ku penerang berita, program nya nyadi inisiatif perintah mantu kes bantu enda disadang nengah saup belanja tekala nya kelai pengasih ngagai raban begunaka bantu.

“Penerima bantu Program Selami Kasih YKN 2018 ukai sida ti nerima bantu e-Kasih ti diagih nengah Opis Pengintu Pengelantang Mensia Mayuh (JKM).

“Bisi sekeda sida nadai kala nerima bantu ari sebarang raban lalu ari pejalai konsep nyidi enggau mantu, kitai udah mujur ngelala sida tu sereta atur patut deka jampat dipejalai,” ku Menteri Pemansang Indu, Ruang Bilik enggau Komuniti, Dato’ Sri Rohani Abdul Karim lebuh bejadika Program Selami Kasih YKN 2018 di Sebuyau, kena Hari Minggu ke udah.

Pia mega ku iya, bantu jampat tu dikeandal ulih mantu raban ti patut sebedau sida diberi bantu udah nya ari ejensi bukai ti suah agi begunaka timpuh bejalaika pengawa nyerenih enggau ngemendar.

Kesemua penerima udah diberi bantu barang diguna ninting hari enggau perengka dapur.

YKN nyadi ejensi di baruh Opis Menteri Pemansang Indu, Ruang Bilik enggau Komuniti udah ngerah 4,000 raban volunteer sida ti datai ari bala komuniti di menua nya.

Raban volunteer mega dikelala nyadi ‘Volunteer Selami Kasih’ udah ngelala penerima udah tu ba pengawa nyemelaka bantu sereta meretika penanggul bala komuniti.

Program Selami Kasih YKN sebedau nya udah dilancharka Menteri Besai kena 7 March lalu bisi tagit lebih 50 ribu iku penerima di serata menua nyengkaum Sabah enggau Sarawak.

Rohani mega bisi nyuaka bantu ngagai 20 penerima ari sebuah rumah ngagai rumah bukai ngelingi Lingga, Maludam enggau Sebuyau disempulang 20 iku volunteer Selami Kasih ti bela nyaup.