Raban pinchin ari opis pengerai dilalau terus gawa nengah NGO
SARIKEI: Parti Bumi Kenyalang (PBK) semina nyabung siku aja chalun ungkup Pengawa Bepilih Besai Ke-14 (GE14) tu.
Pekara tu udah ditukuka Chairman PBK, Yu Chin Liik lebuh iya nyuaka Surat Serah Kuasa ngagai chalun tunggal sida, Wong Chin King, di opis pampang parti ditu, kemari.
Chin King deka ngelaban chalun Barisan Nasional (BN) ari Parti Sa’ati Rayat Sarawak (SUPP), Dato Sri Huang Tiong Sii enggau penyandang ari Pakatan Harapan (PH) Parti Tindakan Demokratik (DAP), Andrew Wong Ling Biu.
Nyadi parti baru, sida nadai ngelempaika mayuh pengandal deka menang maya bepilih 9 Mei tu, ku Yu, seraya nambah, pekara pemadu beguna iya nya ngasuh pemisi sida diasai lalu pengawa ditegi enggau juluk sida ditemu.
“Ke amat, PBK negika pengawa mulaika hak autonomi Sarawak baka disempekat ba Sempekat Malaysia 1963 (MA63), ti udah lenyau ngelama tu, ku iya.
Taja parti tu nyukung sistem dua parti, iya udah mutuska diri berebut tiga penyuru enggau BN sereta PH laban rampa politik di Malaysia ke diatu agi bedau sedia ungkup nya (sistem dua parti), ku iya nerang.
Kelimpah ari nya, PBK meruan kediri lalu bedau nyereta sebarang gempung baka PH.
PBK udah nganjung peminta nyereta Pakatan Rakyat diatu dikelala enggau nama PH, tang bedau nerima sebarang timbal naka diatu, anang ke deka berandauka agih penuduk, ku iya seraya mantaika pengandal ke alai PH deka ngangauka PBK nyadi komponen iya sebedau Pengawa Bepilih Nengeri (PRN) ti deka datai.
Iya ngapil bala pengundi di Sarikei nyukung chalun PBK enggau berundingka pengawa ditegika parti, kelebih agi negika hak autonomi Sarawak. KUCHING: Raban pinchin ari opis pengerai dilalau terus chakah meri servis pengerai ngagai mensia mayuh di nengeri tu.
Direktor Hospital Sentosa, Dr. Ismail Drahman madahka raban pinchin ulih terus meri servis pengerai baka nengah gerempung ukai dikuasa printah (NGO) enggau ke bukai.
“Aku mesan raban pinchin ari opis pengerai, mai kitai neruska pengawa meri servis, laban aku ngasaika kitai bisi penemu, peneleba enggai mayuh pekara udah diasaika dalam idup.
“Taja pan raban pinchin ari opis pengerai, aku ngasaika kitai ulih neruska nengah pengawa ngerembaika pekara pengerai, laban pengerai tu amat beguna ba pengidup kitai.
“Nya alai servis kitai patut dipajakka taja pan pelasar suba Opis Menteri Pengerai Malaysia (KKM) tang pengudah pinchin kitai ngena pelasar baka gerempung NGO, gerempung enggau ke bukai. Tu patut dipajakka ngambika pengidup lebih berega,” ku iya.
Dr. Ismail mansutka pekara nya lebuh bejaku ba Majlis Jasamu Dikenang 2017 & 2018 ke diatur Opis Pengerai Nengeri Sarawak ba sebuah hotel ditu, kemari.
Pengerami nya kemari dipenyadika Menteri Kaunsil Kandang Menua enggau Pengawa Berumah Datuk Dr. Sim Kui Hian sereta sama bisi digulu Direktor Opis Pengerai Nengeri Sarawak Dr. Jamilah Hashim.
Ba pengerami nya Dr. Sim diberi basa nyuaka Setipikit Pinchin ngagai urung 310 iku orang pinchin enggau ke nyau deka pinchin ba taun 2017 enggau 2018 ari Zon Selatan Sarawak ti mungkur kandang menua Kuching ngagai Sri Aman.
Berebak enggau tu Dr. Ismail ngelalau seraya ngingatka semua raban pinchin enggau ke nyau deka pinchin ngemeratka pengerai diri lebih ari utai bukai.
“Aku selalu madah ngagai sida ke udah pinchin iya nya ukai aku madah duit ukai pekara ti enda beguna tang pengerai pekara ti patut pemadu dikemeratka. Enti nadai pengerai tang kaya baka ni pan pedis meh idup.
“Kitai mega ulih mantu opis pengerai madahka pemesai guna pengerai ngagai mensia mayuh ngambika rayat ba nengeri tu bepengerai lalu ulih neruska juluk perintah nengeri ke deka ngemajuka nengeri,” ku iya ti bejaku ngarika raban pinchin ba pengerami nya.