PBB Bukit Sari gagaka pemutus Henry agi dipilih ngetanka Lawas
MIRI: Parti Pesaka Bumiputera Bersatu (PBB) Bukit Sari nerima manah pemutus ngangkatka baru penyandang penuduk Parlimen P222 Lawas, Datuk Henry Sum Agong ngambi ngetanka penuduk iya.
Sapit Chairman PBB Pampang Bukit Sari Kaunsilor Awangku Jinal Abi- din Pengiran Jawa madah Henry ke mega mangku pengawa Sapit Menteri Dagang Dalam Menua, Koperasi enggau Orang Bebelika Barang nyata ngembuan rikot pengawa pemadu manah ngenataika servis ngagai komuniti lalu agi tubah patut dikereja.
“Menteri Besai enggau Kepala Menteri bisi pengandal ngagai iya ( henry) laban iya seruran semak ba ati rayat lalu udah gawa nadai kala bechiping ngagai sebarang bansa enggau pengarap.
“Parti tu begulai enggau parti komponen Barisan Nasional (BN) ke bukai deka bebendar gawa ngulihka pemenang manah agi ungkup parlimen Lawas maya Pengawa Bepilih Besai ke-14 (PRU14) kena 9 Mei tu,” ku iya lebuhka dirandau pengarang berita kilah ensana.
Awangku Jinal madah pengawa milih Henry baru dikearap ulih ngelancharka mayuh agi perambu projek pemansang dikena ngemaju enggau ngerembaika kandang menua Lawas mansang ke mua.
“Datuk agi dipinta gawa ngemai mayuh agi projek perintah besai ngagai pelilih tu lalu nentuka semua perambu deka dipejalai di menua tu ti datai ari kandang tanah baru tebing tasik ngagai tanah lapang tinggi di menua ulu,” ku iya.
Rambau PRU13, Henry mujur teulihka 9,928 undi ngalahka chalun ari DAP, Baru Langub ti semina bulih 3,898 undi.
Henry nempa nama kena 27 Jun 2016 nyadi ketuai keterubah ari komuniti Lun Bawang ti dipadu nyadi sapit menteri di kabinet perintah besai.