Baru milih bediri ba Selangau berindik ari pinta pampang PKR

SIBU: Chalun Pakatan Harapan (PH) ungkup penuduk Parlimen Selangau Baru Bian madah pemutus iya bediri minta pilih di sitak nya ari peminta pampang PKR Selangau.

“Sebedau tu sida kala berandau enggau aku ngambika nyabung aku bediri minta pilih di Parlimen Julau. Kebuah pia laban isu ti dibai mega tebal agi bekaul enggau NCR ti suah ditegika kami ngelama tu,” ku iya.

Ku iya, iya setujuka diri bediri minta pilih di sitak nya pengudah nyerenih pengerembai politik di Selangau ke alai majoriti pengundi bansa Iban.

Nangkan nya, chalun Ba- risan Nasional (BN) P.214 Selangau Rita Sarimah Patrick Insol madah manifesto BN nengeri ba Pengawa Bepilih Besai ke-14 (PRU14) deka nyadika lalau gawa dikena ngintu sukung pengundi.

Ku iya, isu bekaul enggau tanah Adat Bansa Asal (NCR) ti suah ditegika penyakal mega deka diberi pemerat nentuka rayat nerima penerang betul.

“Endang bisi kes pechara ngaul NCR datai ari sitak Tamin, Selangau.

“Tang enda tentu mayuh laban tanah NCR di sitak nya udah digazet di baruh Seksyen 6 lalu enti bisi pen penyarut semina ngaul siti dua endur aja,” ku iya.

Iya mansutka jaku nya lebuh dirandau pengarang berita pengudah nyuaka pom nyadi chalun ngagai Pemesai Pengawa Bepilih P.214 Selangau, Enting@Inting Nyami.

Palan endur ngantung nama ungkup P.214 Selangau di Balai Mayuh Guna Selangau.

Sama bisi datai Kaban Kunsil Nengeri (ADUN) Kakus Datuk John Sikei ti dipadu nyadi penganjung nama chalun ngagai Rita lalu ADUN Tamin, Ir Christopher Gira Sambang nyadi penyukung.

Nitih ku Rita, isu NCR nyangka ulih diputar maya deka dibantai ba Aum Kunsil Nengeri ( DUN) bulan Julai tu.