Taja mayuh kondominium ditu (sitak Batu Kawa) tang rega iya kelalu mar, rayat mayuh enda tetangkupka rega nya: Dr Sim
KUCHING: Sepenyampau 5,000 unit Rumah Mampu Milik (RMM) deka digaga ba sitak Parlimen Stampin dalam timpuh lima taun, sepekara ari Manifesto P.196 Stampin, Pengawa Bepilih Besai Ke-14 (PRU14).
Chalun Barisanan Nasional (BN) Parlimen Stampin ti mega Menteri Kaunsil Kandang Menua enggau Pengawa Berumah, Datuk Dr. Sim Kui Hian madahka, nya dikena mantu peranak dalam sitak nya ngambika ulih ngembuan rumah ke diri empu.
Iya madahka kandang endur dalam sitak nya jampat mansang sereta mayuh peranak ti begunaka rumah.
“Diatu taja pan mayuh kondominium ditu (sitak Batu Kawa) tang rega iya kelalu mar, rayat enda tetangkupka rega nya.
“Nya alai diatu kami deka nentuka bisi 5,000 unit Rumah Mampu Milik digaga ba sitak Batu Kawa. Kami deka nyadi relistik, laban tu dipejalai (manifesto) dalam timpuh lima taun.
“Pekara tu nyadi dalam kandang lima taun nya, tiap
Pekara tu nyadi dalam kandang lima taun nya, tiap taun kitai deka ngaga 1,000 unit Rumah Mampu Milik dalam sitak Stampin. Aku pechaya peminta engka lebih ari penyampau nya. Datuk Dr. Sim Kui Hian Menteri Kaunsil Kandang Menua enggau Pengawa Berumah
taun kitai deka ngaga 1,000 unit Rumah Mampu Milik dalam sitak Stampin. Aku pechaya peminta engka lebih ari penyampau nya,” ku iya.
Dr. Sim ti mega Presiden Parti Rakyat Bersatu Sarawak (SUPP) mansutka pekara nya lebuh bejadika Manifesto P.196 Stampin ke diatur ba Bilik Operasi SUPP pampang Batu Kawa ditu, kemari.
“Kami deka ngamatka semaya nya alai nama ke udah disemaya kami deka ngereja iya,” ku iya.
Bejaku baru iya madahka enggau penambah tauka pemayuh rumah ke digaga dalam parlimen nya pemansang bukai baka kereban guna tiap hari dalam sitak nya mega patut ditambahka.
Enggau penambah rumah sereta mensia ku iya, dalam parlimen tu begunaka lebih mayuh sekula, palan universiti, sereta palan ke nyukung ruang bilik baka nyendiaka mayuh palan ngibun enggau nyeridi nembiak mit.
“Nambahka nya kitai deka nyendiaka aktiviti ekononomi ngambika ke ibuh pansut tauka ngelawa endur bukai baka ke Samarahan.
“Nuan meda di Samarahan, mensia mayuh nurun gawa ari Samarahan ke Kuching, lalu tiap pagi mega mensia mayuh nurun gawa ari Kuching ke Samarahan, lalu jalai ba kededua piak bisi penanggul.
“Kitai enggai pekara ti baka nya nyadi maya nurun gawa, nyema nuan diau kandang endur Stampin nuan ulih gawa ba Stampin ari tu ulih ngurangka penanggul penyekut jalai sereta ulih produktif maya bejalaika pengawa,” ku iya.
Kelimpah ari nya atur pejalai kerita tauka trafik enggau jalai mega pekara dikemerat dalam Manifesto P.196 Stampin ti mungkur jalai alternatif baru ngagai Stampin Resettlement Scheme, ngemesaika jalai ngagai tiga lorong ba Off Jalan Stakan, ngaga jambatan baru kedua Batu Kawa enggau ke bukai.
“Kota Sentosa bisi kena langgur pansa pejalai LRT nuju ngagai Serian. Nya alai kitai bisi minta ngagai kepala menteri ngambika nambahka palan pengetu LRT ba Batu 10, Kota Padawan lalu Kepala Menteri Abang Johari besemaya, lalu patut iya ok.
“Laban ba Batu 10, Kota Padawan aja bisi lebih agi 5,000 unit rumah, mayuh Kampung tauka genturung pendiau ke dalam kin,” ku iya.
Dalam manifesto nya mega mungkur pengawa deka ngaga tebatan banjir sereta ngemanahka sistem parit dikena mutarka bah ngenyit enggau ke bukai.
Manifesto nya mega merambu deka nyendiaka palan endur mensia mayuh ngelantangka diri, balai polis baru, balai bomba baru enggau ke bukai.
Sama bisi dalam aum pengarang berita, ADUN Batu Kitang Lo Khere Chiang, Chairman SUPP Pampang Batu Kawa Temenggong Tan Joo Phui enggau ke bukai.