Ketuai komuniti ari tiga sitak menua nyukung Nanta
KAPIT: Bala ketuai komuniti ngarika peranak menua Pelagus, Katibas enggau Bukit Goram begulai enggau bala komuniti bukai udah mantaika sukung nadai bebagi sereta tegut ngagai chalun Barisan Nasional (BN) di sitak Parlimen Kapit, Datuk Alexander Nanta Linggi ti deka ngetanka penuduk ungkup penggal kelima, menang ungkup BN maya Pengawa Bepilih Besai (PRU) diatur 9 Mei tu.
Tuai Rumah Jelani from Pala Wong, Ikom ari Sungai Sut, Robertson Mawa ari Katibas, Song, Tuai Rumah Kawin rngarika raban indu ari Katibas Song, Penghulu Abang Hamzah Abang Bolhassan ngarika bansa Melayu, Chairman SUPP Kapit James Ling Thian Ing ngarika SUPP pampang Kapit, Anita Karmella ngarika raban indu di Kapit sereta Temenggong Wilfred Billy Panyau, ADUN Pelagus, Wilson Nyabong Ijang, ADUN Bukit Goram, Jefferson Jamit Unyat enggau Tan Sri Datuk Amar Leonard Linggi Tun Jugah udah mantaika sukung sida ngagai Nanta, rambau gempuru diatur nyerumba hari ngantung nama di rumah Nanta, di Jalai Puan Sri Tiong kena lemai Hari Lima ti udah digulu lebih ari 1500 iku.
Chalun BN di Kapit, Nanta minta semua komuniti di Kapit seruran meri sukung sida ngagai perintah.
“Pekara pemadu beguna iya nya lambang perintah (BN). Kitai meseti nyukung pemanah polisi Menteri Besai, Dato Sri Mohd Najib Tun Razak, ti meri fokus ngintu pengelantang rayat kelebih agi komuniti menua pesisir.
“Arama kitai bela nyukung BN, meri Menteri Besai mandat numbuhka perintah baru lalu nampung perambu transformasyen iya ti pulaika pemaik besai ngagai komuniti menua pesisir.
“Menteri Besai mayuh polisi manah nengah rambai jaku 1Malaysia ‘Rakyat Didahulukan, Pencapaian Diutamakan’.
Tu udah nyata dipeda di Kapit kelebih agi di baruh penggal pengawa dipegai Najib ari taun 2009 ngagai 2018, projek pemansang besai udah dipejalai nyengkaum Jalai Besai Pan Borneo, jalai Kapit-Song-Kanowit enti dibida nadai jalai dalam taun 2008, sebedau Najib,” ku Nanta.
“Tu nyata dipeda nengah agih belanja ngelama tu kenyau ari taun 2009 ungkup sitak Parlimen Kapit, bejuta ringgit ungkup mayuh bengkah projek pemansang nyengkaum Bekal Kuasa Karan Menua Pesisir (RES), bekal ai, projek nangkir palan meresi ai baru, bantu berumah sereta mayuh ke bukai.
Nya alai, rayat meseti terus nyukung perintah di baruh pegai Najib, meri iya mandat ngambika numbuh perintah baru, nentuka iya ulih ngemai mayuh agi program transformasyen ungkup rayat,” ku Nanta madah nyemetak.
“Najib ngemai mayuh pemansang ngagai komuniti menua pesisir lalu kitai patut anang mendingka penyakal ti nyalah perintah dipegai Najib ti enda bejalaika projek pemansang ungkup rayat kelebih agi di Kapit.
“Sida ti bepiak ngagai penyakal ngemai isu dalam blog enggau Facebook ke alai Kapit nadai pemansang iya nya sida ke diau luar ari menua Kapit, di Semenanjung Malaysia lalu sida enda nemu pekara ke nyadi di Kapit diatu, taja sida madahka diri asal ari Kapit laban sida jarang ngindikka kaki ditu.”
Nanta nyemetak madahka bala ketuai penyakal ti disukung ex-Menteri Besai, Tun Mahathir Mohamad, begulai enggau Lim Kit Siang enggau Annuar Ibrahim nadai ngelui ari Najib.
“Tun Mahathir kala nyadi orang chukup bekuasa di menua tu, kapasiti iya nyadi Menteri Besai enggau Menteri Wang.
Iya nadai kala bejalai ngabas Kapit sepanjai 22 taun nyadi Menteri Besai. Iya semina kala ngabas Nanga Engkuah di Song. Iya enda mendingka pinta ari peranak Kapit ti randakka sambung jalai ari Kapit/ Song/ Sibu enggau nganjung lutur gawa di klinik Song,” ku Nanta.
“Annuar Ibrahim kala nyadi Sapit Menteri Besai udah nya kala ngabas Kapit dalam taun 1995.
Rambau pejalai nya, iya semina ngemendarka geran penyampau RM15,000 dikena nyeleti jalai di Jalai Bukit Goram ngelawa Rumah Bundong (suba Rumah Enggin).
Enti sema Anwar setuju deka ngagihka belanja dikena ngaga projek jalai, iya udah tembu digaga pengudah 23 taun,” ku Nanta.
“Tun Mahathir enggau Anwar enda mayuh bejalaika pengawa ngintu pengelantang bala pengajar enggau sekula lebuhka megai pangku pengawa nyadi Menteri Besai enggau Sapit Menteri Besai. Di baruh pegai Najib ke baru, sekula udah bisi bekal kuasa karan 24 jam, ke alai bala pengajar, bala staf di sekula sereta mega staf di opis pengerai bisi dianjung gawa ngagai kandang menua pesisir bisi diberi insentif di baruh Pendalaman 1 (P1), P2 and P3 seraya agih pemakai ninting hari (ration) ungkup bala nembiak disekula udah ditiki ari RM3 di baruh pegai Anwar ngagai lebih ari RM12 diatu.
“Nadai pematut parti politik penyakal di baruh pegai Tun Mahathir enggau Anwar madahka sida jauh manah ari perintah dipegai Najih.
Nya alai, kitai meseti ngetanka polisi transformasyen Najib sereta nyukung tegut BN maya PRU tu,” tandu Nanta.
Nanta nangkan rayat patut berunding manah ngaul diri enggau bala penyakal. Sida nyangka enda tetangkupka peminta rayat, nya alai sida semina ulih ngereja pengawa nyalahka perintah ti ngintu pengelantang rayat, nengah media rama dikena ngerachun runding rayat ngambika ngelaban perintah.
Maya PRU Ke-14 sekali tu digelar indu semua pengawa bepilih, Nanta deka betengali alan enggau chalun ari DAP, Paren Nyawi.
Rambau PRU13, Nanya menang enggau majoriti besai 9,731 undi, betengali alan enggau chalun DAP, Ramli Anak Malaka.
Iya teulihka 13,446 undi ngalahka chalun DAP, Ramli Anak Malaka ti bulih 3,715 undi.