Penyakal ‘buta’ enda meda pemansang di Serian: Riot
SERIAN: Chalun Barisan Nasional (BN) di Serian, Dato Sri Richard Riot Jaem ngumbai penyakal ‘buta’ enda meda mayuh pemansang ti udah dipejalai di Serian.
“Semua semua mayuh pemansang udah dipejalai di Serian. Barang sapa ti madah nadai, aku deka manah sida nya buta.
¡°Semina 200 meter ari tu (Opis Pelilih Serian) iya nya Palan Latih Industri (ILP) Serian, ke alai kereja udah berengkah digaga lalu deka tembu datai ba taun 2021. ILP Serian tu kereja aku ke nyadi Menteri Pengatur Pekereja.
¡°Ari ILP tu, aku pechaya rayat kelebih agi di Serian deka sedia agi napi pemar dibai Industri 4.0. Latih pengelandik teknikal enggau pelajar vokasional chukup besai guna. Baka ti ditemu kita, datai ba taun 2020, 65 peratus kereja deka begunaka latih teknikal enggau vokasional. Tu pekara ti dikedeka aku ungkup Serian, nyikap sida napi pemar tu,” ku iya madah ngagai pengarang berita ditu, tembu pengawa ngantung nama di penuduk sitak Parlimen Serian, kemari.
Iya nimbal tanya baka ni BN deka mutarka isu dibantaika sida ti ngelaban nyengkaum sebana kurang pemansang di Serian.
Ku Riot nambah, is utu deka diterang maya timpuh bekimpin. Iya melabaka mayuh isu ditempa penyakal ari melitka pekara ungkup tuju politik.
Chalun Parti Tindakan Demokratik (DAP) di Serian, Edward Andrew Luak udah madahka iya deka ngemai pekara kurang pemansang di Serian nyadi antara isu iya maya bekimpin.
Ku Edward, penyikap perengka guna disediaka perintah BN bisi pengelemi enggau pengurang kelalu lama.
Tu nyengkaum Sepital Serian, digaga dalam taun 1970an, ke alai perengka guna di sepital nya enda kala dikemanah, lalu opis pesakit pulai hari enggau klinik kelalu sekut.
Edward mega nanya kini penungga Sekula Sekondari (SMK) Serian N0.2, ti udah dikemendar dalam taun 1996 tang bedau digaga.
“Aku mega deka bejaku pasal Chukai Barang enggau Servis (GST), ti ngasuh belanja idup niki sereta nating rayat ditu, tebal agi raban bumai ti seranta.
Seraya chalun ngatika diri, Senior William Rade madahka tuju iya deka ngangkatka tikas idup raban bumai di Serian nyema dipilih.
Senior, ti udah ngemaduka diri gawa nyadi Menijar Kanan Opis Pengawa Betanam Betupi Sarawak, madah iya udah nyaup mayuh raban bumai lebuhka gawa lalu iya ngarapka sida deka ngingatka jasa nya datai ba hari bepilih.
“Aku dekaka Serian nyadi palan pemansut pemakai. Serian bisi pengulih nyadi mansutka buah ungkup Sarawak. Maya sida ulih ngemanahka penatai pemisi diri, tu deka ngenyemakka takah antara sida enggau bala ke diau di kandang mengeri,” ku iya.
Niang apai Senior, William Rade suba penghulu ti jelai rita di Serian. Senior empu kala nyadi kaunsilor di Kaunsil Pelilih Serian.