Taja sida bekimpin minta pilih tang tanggungpengawa nyaga penyerakup rayat pupu bansa patut dikemerat
MIRI: Semua chalun bediri minta pilih enggau raban ti bekimpinka chalun sida dipinta enda mai isu ti sensitif bekaul rayat di nengeri tu, semanjai kimpin Pengawa Bepilih Besai (PRU) ke-14 tu.
Nadai ngira ni bagi parti, ku Sapit Kepala Menteri, Datuk Amar Awang Tengah Ali Hassan nyemetak madahka sida ti bediri minta pilih nyadi chalun maya PRU tu, agi bisi tanggungpengawa nyaga pengelantang enggau penyerakup rayat pupu bansa enggau pengarap di Sarawak.
“PRU tu, enti bala kita (chalun ti bediri minta pilih) menang pen, anang sesekali mai isu pengarap. Anang sesekali malut isu bansa enggau isu sensitif bukai laban tu tau ngasuh pengelantang bansa pambar,” ku iya nangkan.
Awang Tengah mansutka jaku tangkan nya lebuh bejaku ba pengawa bejadi makai serumpu pengasih enggau malam main asal Serakup Lun Bawang Sarawak (PLBS), ti diatur di sebuah hotel ditu, malam kemari.
Iya ngarika Kepala Menteri Sarawak, Datuk Patinggi Abang Johari Tun Openg.
PRU tu, enti bala kita (chalun ti bediri minta pilih) menang pen, anang sesekali mai isu pengarap. Anang sesekali malut isu bansa enggau isu sensitif bukai laban tu tau ngasuh pengelantang bansa pambar. Datuk Amar Awang Tengah Ali Hassa Sapit Kepala Menteri
Sama bisi datai iya nya Sapit Speaker Aum Kunsil Nengeri (DUN) ke lalu nyadi Kaban Kunsil Nengeri ( ADUN) Mulu, Datuk Gerawat Gala, ADUN Piasau ke lalu nyadi chalun Barisan Nasional (BN) ba P.219 Miri, Datuk Sebastian Ting, penaung PLBS ke nyadi chalun BN ba penuduk P.222 Lawas, Datuk Henry Sum Agung sereta presiden PLBS, Ipoi Datan.
Ngelansa pasal PRU sekali tu, Awang Tengah mega ngingatka komuniti Lun Bawang ti nyadi siti ari etnik Orang Ulu di nengeri tu, BN udah ngagihka dua penuduk ungkup Orang Ulu di renggat parlimen iya nya Baram enggau Lawas, ngarika pinta Orang Ulu di Dewan Rakyat.
Nya kebuah iya dekaka komuniti Orang Ulu patut nentuka kededua penuduk tu menang di baruh tikit BN maya PRU tu, ngambika pengari sida ulih mai pinta sida enggau peminta pemansang ngagai perintah besai.
Dulu agi ari nya, ba surat jaku Kepala Menteri ti dibacha iya, Abang Johari dekaka komuniti Lun Bawang ulih meri BN menang besai ngambika iya ke nyadi Kepala Menteri Sarawak, bulih mandat besai berandau enggau Putrajaya.
“Nya alai sukung tegut komuniti Lun Bawang beguna amat maya PRU tu, kelebih agi maya sida bisi pengari di perintah besai, ti deka nyamin mayuh agi pemansang ulih dipejalai perintah pulaika penyenang enggau pengelantang komuniti kita (Lun Bawang),” ku iya nambah.
Berebak enggau pengerami nya, Awang Tengah mega bisi ngemendarka agih belanja penyampau RM150,000 ungkup PLBS dikena ngatur ‘Irau Aco Lun Bawang 2018’ lalu tambah sepenyampau RM500,000 (sebaka enggau agih belanja ti kala dibantai ex- Kepala Menteri niang Datuk Patinggi Tan Sri Adenan Satem) ngambika sida ulih meli begunan kediri empu ti deka nyadi indu opis serakup di pasar Lawas.
Seraya Awang Tengah empu ngemendarka agih belanja ari iya sepenyampau RM30,000 ngagai PLBS sereta ari Gerawat sepenyampau RM15,000.
Ba agih belanja PLBS ari Awang Tengah pula, ku iya, iya deka berandauka penyampau begulai enggau raban serakup nya empu ila.