BN ulih ngetanka penuduk di Parlimen Sibuti: Lukanisman
MIRI: Chalun Barisan Nasional (BN) Parlimen Sibuti, Lukanisman Awang Sauni pechayaka perintah BN ulih ngetanka penuduk nya taja dipekit dua parti penyakal.
Ku iya, sukung enggau kerejasama dua Kaban Kunsil Nengeri ( ADUN) Bekenu, Rosey Yunus enggau ADUN Lambir, Ripin Lamat deka ngenegaphka agi kubu tegap BN nya.
“Aku andal amat ari pemisi kerejasama enggau kaul tegap Rosey enggau Ripin (RR), perintah BN Nengeri nadai bepenanggul ngetanka penuduk Parlimen Sibuti,” ku iya ditu kemari.
Lukanisman mega ngaku sida ti ngelaban iya datai ari Parti Keadilan Rakyat (PKR) enggau Parti Islam Se- Malaysia ( PAS) enda meri jalai lantang ngagai BN.
“Taja siku ari chalun ngelaban bisi mayuh peneleba dalam politik, tang aku nadai kala ngeri, lalu deka gawa pengelama 11 hari nginti sukung pengundi,” ku iya nerang.
Ngelansa pasal strategi kimpin, ku iya, semua manifesto BN di renggat perintah besai enggau nengeri deka diterang silik agi ngagai pengundi baru enggau lama.
“Aku mega besemaya semua semaya perintah besai ti udah besemayaka pemansang fizikal di sitak Parlimen Sibuti dikeamat,” ku iya madah nyemetak.
Tu nyengkaum semaya ngaga Klinik Pengerai Sepupok, Bekenu Ek- splaned, nyeleti sekula lama, ngangkatmanahka jalai alun enggau ke bukai dikeamatka perintah besai.
“Semua pekara ngaul semaya enggau peminta rayat Sibuti deka dibantai baru ba Dewan Rakyat enti BN menang sekali agi ditu,” ku iya.
Lukanisman bisi peneleba nyadi pemesai Opis Pekara Khas (JASA) Sibuti pengelama 10 taun, meretika demografi sereta sitak nya.
Berindik ari nya, iya nadai bepenanggul ngaul diri semak enggau pengundi laban sebedau tu iya udah bejalai gawa nyempulang penyandang penuduk nya, Datuk Ahmad Lai ngabas menua nya.
Taun tu penyampau tubuh pengundi di penuduk Parlimen Sibuti nambah ngagai 31,868 iku lalu pengundi deka bejalaika tanggungpengawa sida kena 9 Mei tu.
Lukanisman mega ngarapka pengundi milih lalu ngaga pemutus enggau manah sereta beratika pemanah rikot perintah BN dibida parti ti ngelaban.