Penyereta ejensi nanam sawit enda lantang ati enggau chara ejensi ngatur sida
SIBU: Penyereta ejensi nanam sawit nengeri tu ari Sibu, Matu, Metading, Mukah enggau Balingian enda lantang ati enggau chara ejensi nya ngatur sida.
Pengari sida, Amie Entri madah, semua kebun dandang besai di serata Sarawak dipejal dipegai anak kompeni ejensi nya nejuka penyereta diatu balat bendar rugi ketegal belanja dikena kelalu besai.
“Ambika banding, ba projek Batu 11, Sibu, ungkus ke bendar dikena ngereja pengawa muai pelepah sawit iya nya RM0.50 sepun tang udah dipegai anak kompeni ejensi nya diatu ngaji kereja nya RM1.30 sepun.
“Enti gaji ngesum sawit, ejensi nya suba natak RM12 seikar lalu anak kompeni ejensi nya natak RM44.40 seikar.
“Anak kompeni ejensi tu berengkah megai semua kebun besai sawit di Sarawak kenyau taun 2014 suba.
“Kenyau ari nya, bala penyereta balat amat rugi,” pia ku iya ngarika bala bukai maya aum media ditu.
Kelimpah ari nya, Amie mega madahka dividen penyereta mega enti nunda dibayar tiga kali setaun tang udah dikurang ngagai dua kali se- taun lalu diatu bisi mega bala penyereta enda diberi dividen ketegal kebun dandang besai sida napi pengerugi.
“Pun pengerugi tu nyadi endang ketegal sida manijer ti semina ngira diri aja.
“Manijer ba Sibu enda kala datai enggau baum projek Batu 11 lapan kali bejurut tauka dalam kandang dua taun tu sebedau iya dipindah ke bukai.
“Kelimpah ari nya, maya aum besai kena 17 April tu tadi, Manijer Besai Sarawak mega enda datai tauka nganjung pengari iya,” ku iya madah baru.
Amie madah, pekara tu udah dibai sida ngagai piak bekaul tang empai kala ditimbal enggau manah.
Berindik ari nya, ku iya, udah maya iya bala penyereta minta Opis Menteri Pemansang Menua Pesisir enggau Kandang Menua datai nyaup mutarka penanggul ke ditapi sida.
“Ke pemadu manah iya nya badu ngasuh anak kompeni nya ngatur kebun dandang besai penyereta.
“Kami mega minta digagaka sebengkah randau antara semua bala penyereta 104 bengkah projek di serata Sarawak enggau piak ejensi empu,” pia ku iya madah.