Pengundi di Puncak Borneo dikearap meri sukung ngagai Jeannoth
BAU: Pengundi di Parlimen Puncak Borneo patut meri pangandal ngagai chalun Barisan Nasional (BN) ngarika sida maya Pengawa Bepilih Besai ke- 14 ( PRU- 14), 9 Mei tu.
Kaban Kunsil Nengeri ( ADUN) Serembu, Miro Simuh madah, komuniti renggat baruh patut mantaika sukung tegut sida ba undi ngagai chalun baru BN di Parlimen Puncak Borneo, Jeannoth Sinel maya PRU14 ila.
Ku iya, rayat di menua nya patut ingat semina perintah BN aja ti seruran ulih ngemai pemansang lalu ngatur pengawa ungkup sitak Parlimen nya enggau nyulut.
“Perintah BN nadai kala nejuka pengelantang rayat renggat baruh di Parlimen Puncak Borneo ngelama tu.
“Berindik ari nya aku ngarapka semua pengundi di Parlimen Puncak Borneo ngambika sedar penyakal nadai penau ngatur pengawa ba sitak nya,” ku iya lebuhka bejaku rambau Pengerami Gawai Makai Asi Baru di Balai Komuniti Kampung Kopit ditu, malam kemari.
Sama bisi datai chalun BN ba Parlimen Puncak Borneo, Jeannoth Sinel.
Miro ke mega Katuai Pampang Parti Pesaka Bumiputera Bersatu ( PBB) nambah, komuniti renggat baruh patut enchelak meda gempung penyakal ti dipeda landik agi bejaku ari gawaka rayat.
Iya mega ngarapka pengundi atas pagar di sitak Serembu ngaga pemutus memanah enggau meri sukung ngagai chalun BN.
“Nya alai, beri awak ngagai Jeannoth bejasa sereta gawaka rayat di Parlimen Puncak Borneo.
“Kitai andal amat penau enggau kredebiliti ti dikembuan iya (Jeannoth), iya ulih ngemai mayuh agi pemansang kelebih agi di sitak Serembu,” ku iya nambah.
Berebak enggau pengerami nya, Miro mega udah nyuaka geran sepenyampau RM5,000 ngagai raban Kemas Kampung Kopit.