Penyakal ngena jaku umpan laban minta kasih sereta sukung rayat
BINTANGOR: Perintah nadai jaku umpan ‘Hot Air’ munyi ku tuduh penyakal dalam pejalai pengawa ke digaga Barisan Nasional (BN) di menua tu, ku Kepala Menteri, Datuk Patinggi Abang Johari Tun Openg.
Ku iya, semua jaku umpan sereta pekara ke bekait enggau nya ti digaga penyakal dikena sida nguji matak ati mensia mayuh, minta kasih sereta sukung rayat ke pemerat politik sida iya empu.
“Semua pengawa tu ulih dipeda nengah pengawa sereta pemansang ke majak digaga di menua tu. Perintah BN di menua tu ba jalai ke betul laban pemesai BN menua tu ngembuan kaul ke pengabis manah enggau Perintah Besai.
“Nengah pengarap ke tegut bansa nya, iya ngulihka pemesai Sarawak mantaika nyawa ke inggar agi minta tetiap pemansang, ungkup sereta agenda bukai ke mai penguntung ngagai rayat di menua tu.
“Nya alai, kami ngarapka maya Pengawa Bepilih Besai ke-14 (PRU14) tu, mandat, pengarap sereta pemenang ke besai diberi ngagai chalun BN ulih rayat di menua tu,” ku iya.
Abang Johari madah munyi nya lebuh bejaku ba atur pengawa ngepunka ‘Program Sejiwa Senada Bintangor’, ti digaga di Stadium Bola Keranjang Bintangor, semak ditu, kemari.
Bintangor nyadi sitak ketiga alai ngaga Program Sejwa Senada ke taun tu.
Ba atur pengawa nya, Abang Johari mega madahka pemendar ungkup dalam penyampau RM531 juta diberi ngagai mensia mayuh ke diau di Bintangor ke ulih dikena sida iya ngemanahka agi infrastruktur jalai alun sereta ngemutarka penanggul ai beresi di sitak nya.
Ku iya, pengawa ngemanahka agi jalai sereta ngemutarka penanggul bekal ai beresi di sitak nya deka digaga enggau jampat.
“Ari penyampau nya, urung RM450 juta udah diungkupka kena ngaga jalai pesisir pantai ke baru dalam penyauh 17 kilometer, ke nyambung pasar Bintangor enggau jalai besai Tanjung Manis-Sibu.
“Kelimpah ari nya, RM81 juta kena ngemanahka agi pengawa sistem bekal ai beresi di sitak tu ke mungkur pengawa masang paip sereta ngaga ‘ booster pam’ ai,” ku iya.
Sama bisi enggau ngulu atur pengawa nya, Sapit Kepala Menteri, Tan Sri James Jemut Masing, Menteri Muda di Opis Kepala Menteri (Pekara bekiat enggau Ehwal Korporat), Abdullah Saidol, Sekretari Perintah Menua Sarawak, Tan Sri Datuk Amar Mohamad Morshidi Abdul Ghani, Kaban Kunsil Nengeri Meradong, Ding Kuong Hiing, chalun BN ke Parlimen P208 Sarikei, Dato Sri Huang Tiong Sii, chalun BN Parlimen P206 Tanjung Manis, Yusuf Abdul Wahab sereta pemesai ke bukai.
Semua pengawa tu ulih dipeda nengah pengawa sereta pemansang ke majak digaga di menua tu. Perintah BN di menua tu ba jalai ke betul laban pemesai BN menua tu ngembuan kaul ke pengabis manah enggau Perintah Besai. Datuk Patinggi Abang Johari Tun Openg Kepala Menteri Sarawak