Sibu Jaya deka bisi gerija ungkup raban Kristin Anglikan

SIBU: Pengingin ati raban Kristin Anglikan di Sibu Jaya deka bisi gerija baru deka tepantup sepengudah pekara nya dikemeratka Pemesai Khas ngagai Menteri Besai Datuk Paduka Mohammad Yusof.

Chairman Komiti Pengawa Ngaga Gerija (CBC) Anglikan Sibu Jaya Sylvester Candy Pai udah nyuaka profail enggau penerang peminta ngagai Mohammad maya Pengerami Makai Malam Ngiga Turu St John’s Extension Centre ( SJEC) Anglican Church, Sibu Jaya ba sebuah restoren ditu, ensana.

“Aku udah ngenataika peminta tu ngagai Putraja ngambika kitai bisi diberi geran ari perintah tauka saup ke bukai ti ulih dikena ngaga gerija baru.

“Nambahka nya, menua tu menua ke diuan pupu raban bansa lalu perintah ngembuan tanggungpengawa nyediaka endur besembiang ngagai rayat,” ku iya madah.

Pengerami malam nya dipenyadi Ketuai Pemesai Eksekutif Koleh ITA Dato Seri Diraja Dr Benny Lee.

Bela datai maya tu iya nya Chairman SJEC Basa Gali sereta bala raban gerija ke bukai.

Pengerami tu diatur dikena ngiga turu SJEC dikena ngaga gerija baru Anglikan di Sibu Jaya.

Slyvester mega madahka diri berasai temegah ati enggau penatai Mohammad ba pengerami nya tu mega dibai Dr Benny.

“Kitai enda nyangka iya ulih datai ngagai pengeremai ke mit baka tu lalu tu seninjik bendar kitai randaka saup ngaga gerija baru di Sibu Jaya.

“Ngarapka Menteri Besai Datuk Seri Mohd Najib Tun Razak ngemanaka peminta kitai tu,” ku iya sambil madah SJEC di Sibu Jaya udah ditumbuhka kenyau ari 2006 lalu diatu sida agi nyiwa rumah kedai alai besembiayang.

Ba jaku iya, Dr Benny minta pengundi di Sibu Jaya ngambika nurun ngundi dikena nentuka sapa nyadi perintah menua tu maya Pengawa Bepilih Besai Ke-14 (PRU14) tu.

“Pilih enggau manah laban undi kita nentuka pengidup dudi haru.

“Kitai meseti nyukung chalun ke endang ulih mai pemansang ngagai kitai,” pia ku iya madah.

Dr Benny maya tu bela nyuaka pemeri RM2,000 ari iya empu ngagai SJEC.