Andrew Wong nyadika RS1 dikena mutarka sitak ti dikelai ‘chelum’
SIBU: Chalun Barisan Nasional (BN) Parlimen Sibu Dato Andrew Wong Kee Yew deka ngena Pelin Pemansang Sibu (RS1) nyadika chara iya mutarka semua kandang endur ti dikelai ‘chelum’.
Ku Andrew, sesebengkah endur nya dipadahka ‘chelum’ bepun ari pengundi dia enda lantang ati enggau nama pengawa ke udah dikereja perintah di kandang endur nya sebedau tu.
“Ba runding aku, sida tu enda rindu ke perintah laban ba sida nyangka ngelama tu pengawa perintah enda manah.
“Semua tu patut diputarka kitai lebih agi bekaul enggau nama penanggul ke bisi ditapi rayat lalu kitai deka ngena RS1,” pia ku iya madah ngagai pengarang berita, kemari.
Dulu agi ari tu iya bisi nemuai ngagai Makit Rejang Park, ti mega sebengkah ari endur ‘chelum’ ba Parlimen Sibu.
Ku Andrew, iya meseti ngatur chara ti ulih nyaup ngaduka pengidup rayat ba parlimen nya.
“Strategi enggau tuju penumbuh RS1 engkaman enggau chara kitai ti ngemeratka perengka guna mensia mayuh baka jalai, karan, ai, telekomunikasyen enggau lampu jalai.
“Enti enda, manah kitai badu berunding deka nyadi menua ke mansang. Ba aku semua tu meseti dikemeratka dulu,” ku iya nerang.
Bekaul enggau undi rayat ngalih ngagai BN lebih agi ba endur ‘chelum’ baka Rejang Park, ku Andrew iya empai ulih nentu ketegal ti agi tumu meri penemu sentang pekara nya.
“Taja pia, aku ngarapka rayat ba ditu nemu aku endang tegut ngamatka semaya. Nama semaya ke udah dipadahka aku ba RS1, endang deka dipenyadika.
“Aku bela ngarapka raban nembiak beratika pekara tu lalu pulai nyukung BN,” pia ku iya nimbal.
Ba Pengawa Bepilih Besai Ke-13 (PRU13), BN alah amat ba Rejang Park ti bela nejuka BN alah di Parlimen Sibu.
Ngelansa pengawa iya ke nemuai nya, Andrew madah, pengawa iya nya baka pulai ke menua laban sebedau tu iya mayuh ngena awak gawa dia maya ke agi nyadi Sapit Chairman Opis Kaunsil Sibu (SRDC).
“Dua setengah taun ke udah, aku suah bendar ke Rejang Park. Diatu mega aku temegah ati laban rayat dia agi ingatka pengawa aku ti ngemujurka 95 peratus projek ngemanahka jalai ditu.
“Ketegal nya, aku beterima kasih ngagai sida taja aku udah badu gawa ba SRDC dua taun suba tang sida mengkang ingatka pengawa aku ngagai sida,” ku iya sambil madah pengawa iya nya kemari nerima timbal ke manah ari rayat ke diau dia.