Pemutus chalun PBDS Baru narit diri di Mas Gading udah disadang

KUCHING: Pemutus Sapit Presiden Parti Bansa Dayak Sarawak ( PBDS) Baru, Patrick Anek Uren narit diri ari bediri ba sitak Parlimen Mas Gading endang udah disadang.

Patrick sebedau tu udah madahka diri deka bediri ba sitak tu ba Pengawa Bepilih Besai Ke- 14 ( PRU14) tu tang enda datai maya hari ngantung nama ensanus.

Ditanya kebuah Patrick narit diri, Pengarah Pemilihan PBDS Baru, Rapelson Richard Hamit madahka pemutus nya endang pemutus ti selubang penemu ari parti.

Pemutus nya dikena meri jalai ngagai chalun Parti Tindakan Demokratik ( DAP) ngambika betengali alan enggau chalun BArisan Nasional ( BN).

“Kami enggai dituduh nyadi ‘ Ejen BN’ ti mechahka undi dalam PRU14 tu,” ku iya lebuh ditelefon kemari.

Dalam timpuh tu, Patrick ti ngaga pemutus narit diri ba jam kepenudi endang udah dipelaba ulih kededua chalun ti bediri ba sitak Mas Gading.

Chalun Bn, Datuk Anthony Nogeh ke dikerandau pengudah tembu proses ngantung nama ensanus madahka iya udah nyangka Patrick deka narit diri.

Tang ku Nogeh, iya enda nyangka betengali alan enggau chalun DAP Mordi Bimol laban iya melabaka bisi chalun Bebas kelimpah ari Patrick.

Tang Mordi, betengali alan nya muka peluang besai ngagai iya ba sitak nya.

Taja pan ba atas keretas, BN ulih ngetanka sitak tu tang mayuh utai ke ulih nyadi ba hari ngundi ila.

Bepalsarka pemutus PRU13, bida takah undi entara Mordi enggau Nogeh enda jauh, ke alai Mordi teulihka 5,293 undi lalu Nogeh teulihka 8,265 undi.