Nadai pekara ti negatif ngasuh besiping enggau semua bansa di nengeri tu
KUCHING: Perengka kimpin maya bepilih baka menira enggau poster kemaya hari tu agi relevan sereta beguna kelebih agi dikena meri kelala chalun ba tetiap sitak bepilih.
Jinggan Jubang, 60, asal ari Lubok Antu bepenemu taja pan dunya udah moden baka ulih bekimpin ngena telefon tang chara ti dipejalaika ari kelia baka ngitang menira sigi agi beguna.
Iya mega bepenemu pengawa ngitang menira enggau poster chalun mega patut beratka pengelikun mensia mayuh.
“Menira enggau poster chalun ke digitang maya pengawa bepilih endang agi patut ngambika rayat nemu sapa ke bediri minta pilih sereta sapa ke patut dipilih.
“Lalu ba penemu lebuh ngantung barang kimpin nya pan patut umbas iya anang ngelui pematut sereta anang ngeruga penguna jalai alun.
“Baka ditu ( Batu 10, Kota Padawan) udah umbas iya, enda ngenusah mensia mayuh lebuh deka nyemerai jalai sereta enda ngelindung orang ke deriba kerita,” ku iya lebuh dikerandau Utusan Borneo maya ninjau Batu 10, Kota Padawan iya nya sebagi ari sitak Parlimen Stampin.
Lebuh ninjau dalam pasar Batu 10, Kota Padawan tebal agi poster chalun enggau menira Barisan Nasional (BN) udah digitang enti dibandingka enggau chalun ke enggau berebutka sitak nya DAP (Chong Chieng Jen), naka maya berita ditulis kemari, lalubedau bisi poster enggau menira iya digitang.
Nambahka nya, Mohammad Mazian Razali, 22, lebuh dikerandau Utusan Borneo bekaul enggau gaya kimpin Pengawa Besai Ke14 (PRU14), iya madahka beberapa hari ke udah maya bekimpin ba kandang endur baka di Matang udah mayuh menira enggau poster chalun digitang.
Mazian bepenemu, pengawa ngaitang kereban kimpin agi relevan dikena jeman diatu dikena ngelakuka chalun.
Tambah mega ku iya, taja pan dunya udah maju sereta moden tang ukai semua kandang endur di nengeri tu udah dibungkur arus internet.
“Senipak enggau pengawa bepilih, diatu kitai ulih meda mayuh menira enggau poster udah digitang dikena ngulihka sukung ari rayat.
“Ba penemu aku pengawa ngantung poster enggau menira endang agi patut dikena ngulihka sukung sereta ngelakuka parti laban kekadang enti ngena kereban teknologi kandang menua ulu bedau tentu bisi internet, bebida mih enti udah serap serata nengeri nyentuk ke menua ulu udah dibungkur arus intenet.
“Taja pia, patut dikeingat- ka menira enda tau dikearap ulih narit sukung rayat laban undi tu rayat ti nentuka diri empu sapa ke deka disukung tambah mega undi tu enda tau ditemu orang bukai. Ba penemu aku engkah mayuh pan menira tauka poster bedau tentu ulih narit pemilih,” ku iya eiku ari pengundi di Sadong Jaya.
Kelimpah ari nya Nizam, 43, ke diau ba kandang menua Matang Jaya lebuh dikerandau madahka dibandingka enggau pengawa bepilih ke sebedau tu, PRU14 iya nya pemadu richah
Ku iya , mayuh endur udah digitang poster enggau menira sekalika ari Barisan Nasional, Parti Keadilan Rakyat, Parti Tindakan Demokratik enggau ke bukai.
“Pengawa ngitang sereta nirika poster enggau menira tu enda ulih dipadahka dikena narit undi, taja pan bisi orang ngantung sekalika poster BN tauka penyakal tang ke bendar kitai enda nemu sapa ke di sukung laban undi nya rasia.
“Enti bekaul enggau pengelikun, aku meda ditu (Matang Jaya) nadai nutup jalai nadai ngelindung jalai taja pan dipasang ba roundabout tauka ba simpang. Engka bisi atur ke patut dititihka sida maya deka ngitang kereban kimpin,” ku iya lebuh dikerandau Utusan Borneo lebuh ninjau ngagai Parlimen Petra Jaya, kemari. MIRI: Tim kabinet Sarawak dalam Barisan Nasional ( BN) meruan bepegai ba pemanah semengat ke enda besiping ngagai semua bansa di nengeri tu.
Kepala Menteri Datuk Patinggi Abang Johari Tun Openg nyamin peranak ke alai nadai pekara negatif nyiping bansa dalam tim kabinet BN iya.
“Aku kepala menteri ungkup bansa Iban, Bidayuh, China, Melayu, Melanau, Orang Ulu sereta mega bansa bukai. Tu mih aku lalu aku meseti enda besiping.
“Nya kebuah aku dekaka tim kabinet aku mega enda besiping ngagai semua bansa laban tu Sarawak. Anang nangika orang bukai seagi Sarawak meruan likun,” ku iya ba mua urung 3,000 peranak lebuh bejadika program Sejiwa Senada Sibuti 2018 ba Palan Transformasyen Menua Pesisir ( RTC) di Bekenu kemari.
Abang Johari nyemetak madah, iya nengah chara iya empu beratika pengawa pemadu manah baka ni chara nempa Sarawak nyulut agi ba tetiap pekara kelebih agi pemansang ba ngulihka penatai pemisi mayuh agi ungkup nengeri tu.
Ku iya, peranak patut beterima kasih laban nengeri tu nadai kala ngasaika sebarang penanggul ba pekara betukar nyadi ketuai ketegal bisi perambu ti meruan ba atur dipejalai.
Iya meri Parti Pesaka Bumiputera Bersatu ( PBB) nyadi chunto ke alai parti nyabung enam chalun baru ba Pengawa Bepilih Besai Ke- 14 ( PRU14) tu.
Iya meri terima kasih ngagai penyandang ba enam penuduk nya ti udah volunteer meri jalai ngagai chalun baru bediri minta pilih ba penuduk nya maya PRU 14 tu nyengkaum penuduk P. 218 Sibuti.
Ku iya, Datuk Ahmad Lai Bujang ( penyandang Sibuti) dalam dua penggal iya udah gawa memanah ke Sibuti.
Taja pia, Ahmad Lai ku iya, enda ulih nampung pengawa diri ketegal gaya pengerai iya ke diatu.
Pengudah berundingka pekara nya, iya ngaga pemutus milih orang biak, Lukanisman Awang Sauni nyadi chalun ke pemadu engkeman nyilih Ahmad Lai.
Ku iya, Sibuti bisi mayuh orang biak, nya alai iya andal amat ati nadai penanggul ngagai Lukanisman gawa begulai enggau ADUN Lambir Ripin Lamat enggau ADUN Bekenu Rosey Yunus ke mega Menteri Muda Orang Indu, Ruang Bilik enggau Pemansang Anak Mit.
“Ari tim tu ( Lukanisman, Ripin enggau Rosey), sida ulih bekerejasama terus ngubah rampa pemansang Sibuti enggau bekunsika tuju begulai gawaka semua peranak di Sibuti ti penatai asal ari bebida bansa, pengarap enggau main asal.”
Sama bisi datai bini Kepala Menteri Datin Patinggi Datuk Juma’ani Tun Tuanku Bujang, Sapit Kepala Menteri Datuk Amar Awang Tengah Ali Hassan, ex- Sapit Kepala Menteri Datuk Patinggi Tan Sri George Chan Hong Nam, Menteri Dagang Temuai, Seni, Main Asal, Nembiak enggau Lumba Datuk Abdul Karim Rahman Hamzah, Menteri ba Opis Kepala Menteri ( Integriti enggau ) Datuk Talip Zulpilip, ADUN Tupong Fazzrudin Abdul Rahman sereta Sekretari Nengeri Tan Sri Datuk Amar Mohamad Morshidi Abdul Ghani.