10 peratus asil minyak nadai meri penguntung ngagai Sarawak: Sim

KUCHING: Presiden Parti Sa’Ati Rakyat Sarawak ( SUPP) Datuk Dr. Sim Kui Huan netapka, semaya Pakatan Harapan (PH) ti semina meri 10 peratus ari asil minyak nengeri ngagai perintah nengeri enti gempung nya megai kuasa enda mai penguntung ngagai Sarawak.

“Ke patut ukai 10 peratus, tang 100 peratus ketegal semua minyak ari Sarawak sigi empu Sarawak.

‘Semaya PH nya mandangka sida nadai beratka pemaik Sarawak tang tebal agi berundingka pemaik Semenanjung Malaysia,’ku Dr. Sim ba aum pengarang berita di Kuching kemari.

Dr. Sim ke nyadi chalun Barisan Nasional (BN) ba Pengawa Bepilih Besai Ke14(PRU14) ungkup sitak parlimen Stampin madah BN dekaka semua untung ari asil minyak nya meseti diberi ngagai Sarawak.

Tang ku iya nambah, PH semina deka meri 10 peratus aja.

Nitihka penerang iya, Petronas ba taun 2017 teulihka untung RM45 bilion ke alai ari penyampau nya RM15 bilion datai ari asil minyak Sarawak.

Ngenang kaul ke sama, iya madah peranak Sarawak ulih diseliah ari mayar chukai enti RM15 bilion nya diempu Sarawak.

Iya ke mega Menteri Opis Kunsil enggau Pengawa Berumah madah asil minyak nya ulih dikena mayar chukai peranak Sarawak ngagai Perintah Besai.

“Enti kitai teulihka 15 bilion setaun ari minyak, nadai kebuah kitai enda ulih nguna duit nya mayar chukai Perintah Besai ngambika semua peranak Sarawak diseliah ari mayar chukai,’ku iya.

Ba taun 2017 ku iya nambah, perintah nengeri mayar chukai rayat ba penyampau RM3.5bilion ngagai Perintah Besai.

‘Ketegal nya, duit ari asil minyak ke dikena mayar chukai rayat enda ngeruga penatai pemisi nengeri.

“Ari RM15 bilion, tajapan kitai mayar tiga tauka empat biliun, kitai mengkang bisi laluh RM10 bilion ungkup program pemansang.

“Nengah duit nya kitai ulih ngaga sekula, jalai, spital enggau perengkaguna bukai tajapan mayar chukai peranak Sarawak,” ku iya.