Menira, poster BN mayuh agi udah digitang ari penyakal
KUCHING: Perang menira nyerumba Pengawa Bepilih Besai Ke-14 (PRU14) ba hari Keempat (kemari) pengawa bekimpin, tebal agi ba tiga parlimen dalam mengeri Kuching ngayanka kereban kimpin ke udah digitang iya nya ari Barisan Nasional (BN).
Bepelasarka tinjau Utusan Borneo ngagai tiga sitak parlimen di mengeri Kuching iya nya Parlimen Stampin, Bandar Kuching enggau Petra Jaya, mayuh agi ke udah ayan menira enggau poster BN ti disempulang menira parti komponen, enti dibandingka penyakal.
Ba semanjai jalai dalam pasar Batu 10, Kota Padawan, ba simpang sereta lampu trafik ba jalai besai nyentuk ke lampu trafik Batu 6 tebal agi poster sereta menira BN enti dibandingka enggau menira Parti Tindakan Demokratik (DAP).
PRU14, sitak Parlimen Stampin diperebutka entara BN diarika Datuk Dr Sim Kui Hian ari Parti Sa’Ati Rakyat Sarawak (SUPP) belaban enggau chairman DAP Sarawak Chong Chieng Jen.
Nambahka nya dalam Parlimen Petra Jaya ti diperebutka tiga parti iya BN, Parti Keadilan Rakyat (PKR) enggau Parti Islam SeMalaysia (PAS), bepelasarka tinjau Utusan Borneo kemari, udah ngayanka perang poster enggau manira( ke chukup balat, taja pan tebal agi BN.
Ba semanjai jalai sepiak kiba enggau kanan ba jalai Satok nyentuk ke sekeda roundabout dalam sitak Parlimen Petra Jaya udah digitang poster chalun enggau meniraketetiga chalun, tang tebal agi lambang dachin.
Bepelasarka tinjau dalam sitak Parlimen Bandar Kuching kededua poster besai chalun Kho Teck Wan (BN) enggau Kelvin Yii Lee Wuen (DAP) enggau menira udah ngemenuh simpang jalai sereta lampu trafik baka ba roundabout Jalai Padungan, Jalai Datuk Abang Abdul Rahim enggau ke bukai.
Kelimpah ari nya dikena napi PRU14, parti ke minta pilih mega udah numbuhka bilik operasyen sekalika ba indu opis tauka pampang.
Dipelabaka perang menira sereta poster deka majak nyadi lebih agi enti timpuh hari ngundi majak semak.
Nyerumba PRU14, semua chalun sereta parti ditetapka nitih atur 11 hari timpuh minimum bekimpin ti ditetapka Komiti Pengawa Bepilih (SPR) ti berengkah pengudah ngantung nama 28 April sereta tembu tengah malam 8 Mei tu. Pengawa muai undi 9 Mei.
Nitihka rikod SPR , bsi 1,220,960 rayat Sarawak berejista nyadi pemilih PRU14 bepelasarka ti digazet kena 10 April 2018, ti disadang sereta dikearapka sampal nurun ngundi kena 9 Mei tu.