Komuniti China dipinta begempung ngundi chalun BN
KUCHING: Komuniti China di nengeri tu dipinta begempung lalu nyukung chalun Barisan Nasional (BN) ba Pengawa Bepilih Besai Ke-14 (PRU14).
Kepala Menteri ke mega Chairman BN Nengeri madah, diatu parti ti ngarika bansa China iya nya Parti Sa’Ati Rakyat Sarawak ( SUPP) udah begempung lalu nadai agi Parti Rakyat Bersatu (UPP).
Berindik enggau nya iya enggai meda komuniti China ditu belaya enggau pangan diri lalu tu mih maya sida mandangka diri udah begempung dalam sa’igi parti.
“Sida ke di Malaya ke suah carut anang nunda, awakka sida. Enti kitai enda begempung ditu, orang bukai deka beambi ulih ari pengelemi kitai nya,’ku iya.
Abang Johari mansutka jaku nya rambau bejadi Program Sejiwa Senada ke diatur di Laman Bandar Baru MJC Batu Kawa ditu, kemari.
Munyika padah Niang Tok Nan(Pehin Sri Adenan Satem) ku Abang Johari nambah, komuniti China ukai orang datai ba nengeri tu.
“Kita( komuniti China) semua peranak Sarawak lalu kitai udah lama ngadu kerejasama enggau pangan diri. Nadai kebuah kitai tau charut enggau pangan diri.
“Enti komuniti China begempung, kita deka nyadi sebagi ari perintah,’ku iya.
Abang Johari nambah, budaya belaya nyadi sa’iti budaya ke dibai parti ari Malaya.
Ketegal nya ku iya, Sarawak nagang parti ari Malaya ditumbuh ditu kelimpah ti nagang sekeda orang politik tama ke nengeri tu.
Ba pengerami ke digulu beribu iku mensia ke diau ngelingi Kuching, Samarahan enggau Bau nya, Abang Johari minta bala pengundi meri sukung ngagai chalun BN di sitak parlimen Stampin enggau Bandar Kuching.
Ba Stampin ku iya, BN deka diarika presiden SUPP ke mega Menteri Opis Kunsil enggau Pengawa Berumah Datuk Dr. Sim Kui Huan.
“Ba pengawa bepilih tu, sapa kita pilih..? lutur (Dr Sim) tauka luya(chalun DAP Chong Chieng Jen)..?
“Arap kita milih lutur ketegal iya sa’iku lutur pakar lalu regas gawa nyemaka niang apai iya Tan Sri Sim Kheng Hong,’ ku Abang Johari.
Ungkup sitak parlimen Bandar Kuching, BN nyabung chalun baru ari SUPP iya nya sa’iku ketuai indu, Kho Teck Wan.