Pakatan Harapan ngandalka jaku petenah nyadi ‘senyata’ ngulih sukung ari rayat
SIBU: Gempung parti penyakal, Pakatan Harapan (PH) dikumbai nyadi sebuah parti ti agi ngarapka sukung ari rayat.
Sekretari Besai Barisan Nasional (BN) Nengeri Datuk Alexander Nanta Linggi madah kebuah pia laban PH agi ngarapka sukung rayat enggau naburka petenah ti ngerachun runding rayat ngambi begedika perintah maya Pengawa Bepilih Besai Ke-14 (PRU14) tu.
“Tu mih ‘ senyata’ sida bekimpin maya PRU14 tu seraya ngandalka rayat nyukung sida.
“Sida ngarapka semua petenah ti ditabur nya ulih nginti undi ari rayat.
“Nya alai, bala sida dipeda nadai gawaka rayat kelimpha betenah aja ti seruran ngandal,” ku iya rambau Program Pemesai Begulai Enggau Rayat di Rumah Monica Gelima, Sungai Durin ditu, malam kemari.
Program udah dipenyadika Menteri Bekal Ai enggau Elekterik Menua Pesisir, Dato Sri Dr Stephen Rundi Utom.
Sama bisi datai Kaban Kunsil Nengeri ( ADUN) Bukit Goram Jefferson Jamit Unyat, tiga Sekretari Politik Kepala Menteri Thomas Romeo Christopher Tegong, Maurice Giri enggau Petrus Igat Matthias, chalun BN Parlimen Lanang Kelvin Kong, Tuai Rumah Monica ti diarika ex-Penghulu Philip Kayak.
Program nya udah digulu lebih 500 kaban komponen parti ti bekimpinka BN ba penuduk Parlimen Lanang.
Nanta ti nyadi Sapit Menteri Pemansang Menua Pesisir enggau Kandang Menua madahka PH mega napi penyarut enggau pangan diri.
“Ketuai ke bansa tu enda nyamin kitai deka ngatur pengawa menua baka pemanah BN laban sida deka pambar berebutka kuasa.
“Maya PRU14 tu, sida endang begempung sereta tampak ‘ sepenemu’ deka ngelabuhka perintah ke bisi tang ke amat sida enda lurus enggau pangan diri,” ku iya, ti nyadi chalun BN Parlimen Kapit.
Berindik ari nya, Nanta minta bala pengundi di Lanang nulak PH kelebih agi Parti Tindakan Demokratik (DAP) maya PRU14 tu laban parti tu deka enda ulih mantu rayat kelebih agi kandang menua pesisir.
“Pilih Kelvin dari BN ti dipeda chukup keran gawa kenyau ari dua taun ke udah, lalu udah lama gawa ngagai rengat baruh.
“Iya endang dikelala di Lanang, tambah mega penatai asal iya ari Sungai Durin, nya- di peranak genturung pendiau ditu,” ku iya nandu.
Nanta madah udah umbas endur pengundi di Lanang nulak DAP maya bepilih sekali tu laban kenyau ari lima taun ke udah rayat napi pengerugi nadai ngasaika sebarang pemansang.
“DAP iya nya sebuah parti suah agi nyalahka perintah laban ba sida, semua salah perintah.
“Taja pia, penyalah perintah sida meda, tang penyalah diri empu enda,” ku iya nambah seraya ngelalau rayat badu agi pechaya sebarang berita ti dibantai ba media rama ti bejaika nama perintah.