Keingat bantu Najib ngagai Sarawak Isu ba Semenanjung nya penanggul sida, enti nadai Najib tentu nadai Pan Borneo
KUCHING:KepalaMenteri Datuk Patinggi Abang Johari Tun Openg nerangka sekeda pekara sentang Sarawak enggau isu ke bekaul enggau Menteri Besai Datuk Seri Najib Tun Razak sereta bini iya Datin Seri Rosmah Mansor.
Abang Johari ke mega Chairman Barisan Nasional(BN) Sarawak enggau nyemetak madah pekara ke nyadi di Semenanjung Malaysia nadai kaul enggau nengeri tu.
Kelimpah ari nya ku iya, peranak Sarawak meseti ingat diak Najib udah mayuh mantu Sarawak enti dibandingka enggau menteri besai ke dulu suba Tun Dr Mahathir Mohamad ke enda ngenah pinta Perintah Nengeri pengelama 22 taun iya mangku pengawa besai nya.
“Isu ke ba Semenanjung Malaysia nya penanggul sida, ukai enggi kitai. Kitai meseti ingat diak Najib mayuh mantu kitai. Enti nadai Najib, nadai Jalai Besai Pan Borneo.
“Maya Dr Mahathir nyadi menteri besai, kitai udah minta ari iya tang enda dikeibuh lalu diatu Najib ngemujur pinta nya,” ku iya ba program randau enggau pemberita ke diatur di Komplek Dewan Undangan Nengeri(DUN) Lama ditu, malam ensanus.
Ngenangkaulbukai,Abang Johari nambah Sarawak suba bisi mayuh bank tang udah ditutup ketegal polisi perintah.
Ku iya, perintah mutus ngempungka sekeda bank nya ketegal kitai enda ngembuan mayuh puku pengudah krisis pekara wang.
Hock Hua Bank enggau Bank Utama entara sekeda bank ke ditutup maya nya, tandu Abang Johari.
“Pengujung iya kitai nadai mayuh bank diatu. Aku enda ulih nerima semua tu. Ketegal nya pengudah aku nyadi kepala menteri, aku numbuhka bank kitai empu iya nya Bank Pemansang Sarawak(DBOS),”ku iya.
Nyaut tanya sentang Akta Pemansang Petroleum( PDA) 1974, Abang Johari madah: “Pekara ke udah nyadi dulu agi ari tu anang dikenang agi. Kitai meseti mandang ke mua arika ngingatka sejarah nya.”
Iya netapka Perintah Besai ke diembing raban ketuai dalam BN deka meri bantu ba pekara belanja tajapan akta nya udah dikemendar lebih 40 taun ke udah.
Nitihka penerang iya, Sarawak enda meri hak ngagai Perintah Besai.
“Nitihka rikut, kepala menteri maya nya madah sida meseti nitihka penetap undang-undang. Tun (Abdul) Rahman ( Ya’kub) nyadi kepala menteri maya nya. Kitai bisi penetap kitai empu tang sida enda nitihka penetap nya.
“Semua duit pulai ngagai KL (Kuala Lumpur) ke alai tu enda betul, Kitai mikir duit nya deka dipulai ngagai kitai, bisi meh mimit tang enda mayuh,” ku iya.
Abang Johari madah Perintah Nengeri deka majakka pengawa nyendia jalai alun di kandang menua pesisir seraya deka ngaga LRT dalam kandang mengeri.
Iya madah semua nya begunaka timpuh ke panjai lalu enda ulih nyadi pia aja.
“Kitai ngaga LRT dalam kandang mengeri sereta ungkup menua pesisir, kitai mega jalai alun ke manah.
“Kitai ngaga kededua tu lalu enda ulih kelalu bepanggai ba Perintah Besai. Semua begunaka timpuh panjai, engka 3 taun tauka kurang agi ari nya,” ku iya.
Iya nambah, pengawa nembuka projek LRT begunaka timpuh 8 taun.
Maya Dr Mahathir nyadi menteri besai, kitai udah minta ari iya tang enda dikeibuh lalu diatu Najib ngemujur pinta nya. Datuk Patinggi Abang Johari Tun Openg Kepala Menteri Sarawak