Penyakal semina ‘keypad Warrior’ nabur berita pelesu kena ngelaban perintah
SIBU: Menteri Bekal Ai enggau Elekterik Menua Pesisir Dato Sri Dr Stephen Rundi Utom madah penyakal suah bemainka sekeda isu di meda rama baka di Facebook tauka aplikasyen Whatsapp.
Sida tu ku iya semina ‘Keypad/Keyboard Warrior’ ti nadai nemu seling pekara kelimpah deka ngemuaska ati diri empu ti ringat ngagai perintah enggau naburka berita pelesu.
“Sida tu iya nya orang ti diau mendam dalam bilik nadai nemu pekara nyadi ngelingi.
“Sida tu raban ti naburka berita pelesu dikena nginti undi ngelabuhka perintah maya Pengawa Bepilih Besai Ke-14 (PRU14) tu.
“Nya alai aku dekaka rayat anang alah penemu raban tu ti dipeda chukup regas kandang diatu enggau tuju ti enda manah,” ku iya.
Iya mansutka jaku nya lebuh bejadika Program Pemesai Begulai Enggau Rayat di Rumah Monica Gelima, Sungai Durin ditu, malam kemari.
Program tu digulu lebih 500 kaban komponen parti ti bekimpinka BN ba penuduk Parlimen Lanang.
Dr Rundi mega nyadi ADUN Kemena nyemetak madahka ulah enda manah dikemeranka penyakal nya ngayanka sida baka nadai tuju bukai kelimpah ari bejaika perintah.
Ku iya, manah agi penyakal fokus chara mantu rayat lalu ukai nya bejaku pasal penyai perintah ti sengaja ditempa.
“Nya kebuah anang salah pilih maya 9 Mei tu. Pilih chalun ti ulih gawa sereta bejalaika servis ungkup rayat, iya nya Kelvin ari BN,” tandu iya.
Iya madahka Kelvin nyadi chalun pemadu manah BN di Lanang ti bisi pengeran gawa tinggi gawaka rayat.
Ku iya, Kelvin bisi kaul manah enggau bala menteri sekalika di renggat perintah besai tauka nengeri.
“Pekara ti beguna amat, Kelvin meseti menang 9 Mei tu dikena ngelancharka agi pemansang di sitak Lanang.
“Iya udah bisi rentayan kereja tauka ‘network’ semina meseti menang aja,” ku iya nandu nyemetak.
Ngelansa pasal PRU14 tu di Parlimen Lanang, Dr Rundi madahka menua nya iya nya sitak kelabu ngagai BN ke alai sebedau tu menua chelum.
“Kitai ngarapka pekara positif deka nyadi di Parlimen Lanang rambau PRU14 tu.
“Ke amat, kitai endang begunaka sukung rayat di Lanang meri mandat ngagai Kelvin,” ku iya nampung.