Pengidup komuniti Penan di Baram deka terus dijaga nyema BN menang
BARAM: Pengidup komuniti Penan di menua ulu Baram deka seruran diintu enti sema Barisan Nasional (BN) diberi mandat terus ngatur pengawa menua.
Kaban Kunsil Nengeri (ADUN) Telang Usan Dennis Ngau madah tu seriris enggau manifesto BN ti besemaya peluang enggau hak deka mayuh agi ungkup Sarawak dikena nentuka nengeri tu ngerembai sebela.
Ku iya, nya kebuah bansa Penan enda patut mendingka jaku penyakal ti deka numbuhka perintah baru laban nya semina jaku manis aja dikena nginti undi.
Dennis madahka rayat di Baram begunaka perintah ti bisi tanggungpengawa ngagai semua bansa enggau pengarap lalu semina BN aja ulih ngesan tanggungpengawa nya, ukai Pakatan Harapan (Harapan).
Iya nikal kenang jeman perintah dipegai ex-Menteri Besai ti mega Chairman HARAPAN Tun Dr Mahathir Mohamad, mar amat ngulihka agih belanja ngaga gerija.
Tambah mega ku iya, agih belanja enda ulih diberi terus ke dalam akaun gerija tang nengah akaun Komiti Pemansang enggau Pengelikun Genturung Pendiau (JKKK).
“Tu bebida enggau atur pengawa Datuk Seri Najib Tun Razak ti nyata lurus sereta beratka peminta semua bansa nadai ngira pengarap.”
“Aku kala minta agih belanja sepenyampau RM1 juta ari iya (Najib) ungkup 18 buah gerija di sitak Telang Usan nyengkaum gerija bansa Penan lalu peminta nya dikemendar tekala nya. Enti sema Harapan megai perintah, pekara tu enda nyadi nyata,” ku iya lebuh bejaku rambau Program Pemesai Begulai Enggau Rayat di Long Lilim, Akah Patah kemari.
Dennis nambah, perintah mega baru ngemendarka lebih RM600 ribu dikena ngemansangka gerija enggau perengka guna bukai di Telang Usan.
“Semina perintah BN ulih meri projek pemansang baka jalai alun, ngaga gerija, tiang pemanchar telefon, balai enggau perengka guna bukai.”
“Enti kita sakit di Sepital Miri, nadai endur bukai lalu begunaka bantu, sapa bagi digiga kita? Agi mega pengari rayat BN ti digiga kita endur minta bantu,” ku Dennis.
Lansa bukai, Dennis dekaka bansa Penan di semua genturung pendiau Akah Patah nyukung chalun BN di sitak Parlimen Baram, Anyi Ngau maya hari ngundi, 9 Mei tu.
Ku iya, pemenang Anyi enggau BN beguna amat dikena ngerichahka agi pemansang di menua bansa Penan.
Berebak enggau program nya, Dennis bisi ngemendarka pengawa ngaga balai mayuh guna di Long Lilim dalam taun baru kelimpah ngemendarka geran RM5,000 ungkup raban nembiak Long Lilim ngatur aktiviti dalam bulan Jun tu.
Lebih 400 iku bansa Penan ari 11 genturung pendiau iya nya ari Long Lutem, Long Kevok, Anyat, Ba Kabeng, Long Melangit enggau Long Kawi bisi datai ngulu program ti diatur Parti Pesaka Bumiputera Bersatu (PBB) Akah Patah Hilir.