Sukung baka ngelamatu patut dipandangka raban orang indu ba parlimen nya ngagai chalun indu keterubah PRS

SELANGAU: Parlimen Selangau ti nyadi kubu kuat Barisan Nasional (BN) kenyau ari suba bela bepun ari sukung 50 peratus pengundi indu.

Kaban Kunsil Nengeri (ADUN) Tamin Ir Christopher Gira Sambang madah, sukung tu patut bela deka dipandangka raban orang indu ba parlimen nya ngagai chalun indu keterubah Parti Rayat Sarawak (PRS) iya nya Rita Insol.

“Suba penuduk tu endang diarika chalun BN ke lelaki lalu pengundi indu enda kala begilik sukung ari sida.

“Nya alai, pemutus milih Rita nyadi chalun ba ditu endang engkeman bepun ari pemanah sukung orang indu ke dipeda ngagai BN ngelama tu,” pia ku iya madah.

Gira mantaika jaku tu maya

Suba penuduk tu endang diarika chalun BN ke lelaki lalu pengundi indu enda kala begilik sukung ari sida. Nya alai, pemutus milih Rita nyadi chalun ba ditu endang engkeman bepun ari pemanah sukung orang indu ke dipeda ngagai BN ngelama tu. Ir Christopher Gira Sambang ADUN Tamin

bela ngulu Pengerami Pemesai Begulai enggau Rayat ba Pasar Selangau, kilah ensana.

Pengerami nya dipenyadi Kepala Menteri Datuk Patinggi Abang Johari Tun Openg sereta bela digulu Rita empu.

Gira mega maya tu mai rayat ba parlimen nya besaup nempa sejarah indu Dayak bansa Iban keterubah nyadi Kaban Parlimen ba menua tu.

“Ngarapka kitai bela datai nyukung Rita 9 Mei tu ba tuju kitai besaup nempa sejarah kena 10 Mei, indu Iban keterubah nyadi Kaban Parlimen Selangau,” ku iya madah baru.

Kelimpah ari nya, ku iya, bepun ari ex-Kaban Parlimen Selangau suba, berengkah ari Datuk Joseph Mauh Ikeh lalu ditangkan Datuk Joseph Entulu, parlimen nya endang semampai nyaup BN menang belama genap kali pengawa bepilih diatur.

Ketegal nya, iya minta, rayat di Selangau meseti dikemeratka ba pekara pemansang baikka pemansang infrastruktur tauka pemansang raban nembiak enggau rama.

“Kitai mega beterima kasih ngagai ex-Kaban Parlimen sebedau tu laban udah bebendar ngetanka Parlimen Selangau nyadi kubu kuat BN,” pia ku iya.

Ngenang penatai Abang Johari datai ba pasar Selangau, Gira madahka penatai nya mega nyadika sejarah pelilih Selangau.

“Tu mega nyadi sejarah ngagai kitai ditu laban Abang Johari, Kepala Menteri keterubah datai ngabas kitai di Selangau.

“Penatai iya tu tampak mandangka iya siku Kepala Menteri ti balat betatika pengidup rayat,” ku iya madah.

ILA DATAI BARU: Peranak menua Selangau nguluka pemulai Abang Johari udah ke nempa sejarah Kepala Menteri keterubah datai ngabas sida. Bela ayan Gira (belakang Abang Johari).