Sepital Sri Aman mengkang nyadi semaya bula BN: Norina
SRI AMAN: Sepital Baru Sri Aman mengkang nyadi semaya bula Barisan Nasional ( BN), ku chalun Pakatan Harapan (PH) di sitak parlimen Sri Aman Norina Umoi Utut.
Nitihka penerang Norina, semaya BN deka nembuka sepital nya ba taun 2018 mandangka BN enda meratka pemaik peranak Sri Aman.
Nambahka nya ku iya, BN sanggup sereta udah suah bebulaka peranak Sri Aman ba sentang projek spital baru nya.
“Aku udah ngelawa palan projek Spital Baru Sri Aman ke disemaya tembu taun tu, tang gaya dipeda aku projek nya baka ke baru dipungkal.
“Diatu udah deka manggai bulan Jun, reti nya bisi enam bulan agi endur nembuka projek nya,” ku Norina.
Ketegal nya iya deka nemu kebuah BN enda kiruhka pengidup peranak Sri Aman.
Pekara pengerai ku Norina bekait enggau pengelantang pengidup rayat lalu enda tau diambi mudah.
“Projek tu nyadi semaya bula BN ke pemadu besai ngagai peranak Sri Aman,” ku Norina.
Berindik enggau nya Norina deka nemu pekara ke dikereja Sapit Menteri Dalam Menua ke mega chalun BN di Sri Aman Datuk Masir Kujat.
“Nama kebuah Masir ke seiku menteri enda ulih mai pekara tu ba aum kabinet menteri.
“Opis iya di Putra Jaya sepiak aja enggau Opis Sapit Menteri Besai Datuk Seri Zahid Hamidi,” tandu Norina.
Iya ngelalau peranak Sri Aman kelebih agi pengundi enda masau undi sida ngagai BN ngambika enda sekali agi dikemula.