Pengundi biak ari Taman Tunku dikearap nyukung Lukanisman
MIRI: Chalun Barisan Nasional (BN) Parlimen Sibuti, Lukanisman Awang Sauni pechaya pengundi biak di Taman Tunku deka meri sukung sida iya ngagai BN.
Iya madah penyampau pengundi di sitak nya lebih 8,000 mensia mayuh lalu sebagi ari penyampau nya ari sida bala nembiak baru.
“Sida tu pengundi biak lalu enda patut sida iya ngenggaika chalun biak ari BN laban perintah ngembuan perambu pemansang ke bala nembiak,” ku iya madah ditu, kemari.
Lukanisman madah sebagi besai ari pengundi Parlimen Sibuti diau dalam mengeri enggaui sub-mengeri baka Taman Tunku, Kampung Abdul Rahman enggau sitak ke besemak enggau Sibuti.
“Kami ngembuan perambu ke silik ke Parlimen Sibuti nyengkaum di sitak mengeri enggau sub- mengeri, nya kebuah berat endar pengundi meri sukung sida iya ngagai BN,” ku iya.
Lukanisman empu udah ngaga tinjau ngagai ke semua sitak parlimen nengah program ‘walkabout’ lalu ba sitak bukai, kimpin sida iya digaga nengah media rama.
“Kami enggau bisi jaku ke madahka chalun nadai ngelawa sitak sida iya lalu betemu enggau pengundi, nya kebuah kami ngena bemacham chara datai semak ngagai sida iya,” ku iya.
Lebuh bejaku pasal penanggul ke ditapi di sitak Taman Tunku, Lukanisman madah pekara bekait enggau penanggul nasional sereta ari sitak tu empu mayuh udah dibantaika.
Entara pekara ti dipejuraika, iya nya kos pengelantang pendiau, rega minyak ke niki, servis, pengelikun, penanggul ampuh bah sereta bemacham utai bukai.
“Perintah Menua sebedau tu udah madahka deka meri ungkup dalam penyampau RM10 juta kena ngemutarka penanggul ampuh bah ditu, lalu pekara bekait enggau pengelikun dikemutar nengah Komiti Mensia Mayuh ke diau di genturung pendiau (JKP),” ku iya.
Iya ngarapka lebih 8000 pengundi ke diau di sitak nya, dalam 11 saluran beratika pemanah pengawa Perintah BN lalu milih iya ngarika sida iya di Parlimen.
Sebedau atur pengawa nya, Lukanisman ti disempulang ulih Kaban Pemesai Parti Pesaka Bumiputera Bersatu (PBB) ti mega nyadi ADUN Lambir, Ripin Lamat ngaga program tinjau ngaul rayat di Taman Tunku.
Sama bisi enggau ngulu atur pengawa nya kemari, Kaunselor Keith Chin sereta raban pengereja pengawa kimpin BN Sibuti.