Lo besemaya deka mantu graduet UNITAR Sarawak
KUCHING: Kaban Kunsil Nengeri (ADUN) Batu Kitang, Lo Khere Chiang besemaya deka mantu mutarka penanggul graduate Ijazah Sarjana Muda Pendidikan Universiti Tun Abdul Razak ( UNITAR), Nengeri Sarawak.
Iya madahka diri deka ngenataika penanggul nya ngagai piak ke bekaul.
“Aku deka mantu kita mai isu tu ngagai piak Opis Pelajar Nengeri Sarawak.
“Udah tembu Pengawa Bepilih tu aku enggau Stella sereta Sanlos, deka mai pekara tu ngagai opis pelajar.
“Aku deka ngaga semaya betemu enggau direktor opis pelajar lalu berandauka isu kita ngena chara tebuka,” ku iya ti besamay mai pekara nya ngagai opis pelajar.
Lo mansutka pekara nya dalam aum pengarang berita ‘Hala Tuju Graduan Pendidikan UNITAR Negeri Sarawak ba sebuah hotel ditu, kemari.
Dulu ari nya Lo mendingka sebana tauka penanggul 105 graduate Ijazah Sarjana Muda Pendidikan ke nadai udah ngajar taja udah lama graduate.
Berebak enggau tu iya ngelalau raban graduate ngambika ngiga peluang gawa bukai seraya ke nganti pengawa nitihka bidang ti diambi.
“Aku meransang kita ngambika enda kelalu milih pengawa, anang semina deka ngiga pengawa ti ngena baju kot aja.
“Kebuah pia laban Sarawak jemah ila mayuh amat peluang disediaka. Mayuh industri sereta pemeranak puku ke datai kitu ti begunaka pengereja pengawa biak.
“Aku meransang kita semua ngambika ulih merening ke mua sereta minta pengawa nama ke ulih enda ngira pengawa, kena pengelandik kita. Graduate ari universiti kita bisi penemu pemun,” ku iya.
Bisi datai kemari, Ketuai Nembiak SUPP Batu Kitang Alvin Chong, pengari graduate Ijazah Sarjana Muda Pendidikan Universiti Tun Abdul Razak, Sanlos Selamat, enggau urung 50 iku graduate universiti nya.