Rumah PPDH ungkup peranak Kpg Boyan nyentuk Kpg Bintawa Hilir
KUCHING: Rumah di Projek Pemansang Darul Hana (PPDH), Petra Jaya diberi perchuma ngagai rayat ke dipindah ari Kampung Boyan nyentuk ngagai Kampung Bintawa Hilir.
Kepala Menteri Datuk Patinggi Abang Johari Tun Openg madah pindah jemah, tetiap ruang bilik deka bisi reta abis kurang RM300,000.
Ku iya, reta bulih sida pindah ba penyampau nya ketegal rega rumah pemadu mudah di Darul Hana RM300,000.
“Pindah aja kita mai beg, nibuh mai utai bukai. Ketegal tanah kita ba endur lama deka dikira. Enti tanah kita besai, besai meh rumah kita di Darul Hana ditu.
“Enti tanah kita mit, kita bulih rumah mit di Darul Hana tang rega makit rumah mit nya manggai RM300,000 lalu kita enda berutang,’ku iya.
Abang Johari mansutka jaku nya ba penemuai kereja ke Projek Pemansang Berumah Darul Hana ditu, kemari.
Nambahka nya Abang Johari netapka enti tetiap rumah nya bisi lebih ari seiti ruang bilik, perintah mega nyendia rumah ngagai ruang bilik tambah nya di Darul Hana.
“Projek tu ungkup timpuh panjai ngambika genturung pendiau kitai ditusun enggau manah sereta disikap enggau perengka guna enggau jalai alun.
“Kitai nyadang projek tu deka digaga dalam timpuh 15 nyentuk ngagai 20 taun,”ku iya.
Dulu agi ari nya, Menteri Muda Utiliti(Bekal Letrik) Abdul Rahman Junaidi madah renggat keterubah sida ke pindah ke Darul Hana disadang ba taun 2020.
Ku iya, renggat keterubah nya mungkur ruang bilik ari Kampung Panglima Seman Lama, Kampung Pulo Ulu enggau Kampung Semarang.
Projek Pemansang Darul Hana nyadi seiti projek ke dikemendar Perintah Nengeri nengah Atur Pemansang Malaysia Lumpar Ke10(RMK10) enggau tuju ngaga ubah ba genturung pendiau melayu di sepemanjai Sungai Sarawak ngambi nempa genturung pendiau ke moden sereta manah.
Projek begunaka tanah pemesai 721 ekar lalu deka mindah 12 iti kampung melayu ke mungkur 2,526 iti rumah, 4,278 ruang bilik sereta 16,655 iku orang.
Bela datai Sekretari Perintah Nengeri Tan Sri Mohd Marshidi Abdul Ghani, chalun Barisan Nasional( BN) di sitak parlimen Santubong Dato Sri Wan Junaidi Tuanku Jaafar, Menteri Dagang Temuai, Seni, Main Asal, Lumba enggau Nembiak Datuk Abdul Karim Rahman Hamzah.