Graduet UNITAR ngarapka sida diberi peluang nyadi pengajar di nengeri tu
KUCHING: Raban graduate Ijazah Sarjana Muda Pendidikan Universiti Tun Abdul Razak (UNITAR) ba Sarawak minta piak bekaul ibuh sereta lebih beratka sida ngisi pengawa puang nyadi pengajar ba nengeri tu.
Pengari Graduate Ijazah Sarjana Muda Pendidikan UNITAR, Sanlos Selamat madahka agi mayuh ke graduate ke ngambi bidang pelajar ba universiti peribit nya ti bedau gawa.
Iya madahka sida iya patut diberi pelung laban sida mega sebaka enggau raban graduate universiti perintah bisi diberi latihan industri tauka praktikal ba sekula kebangsaan, ke mega udah meri peneleba enggau gaya pendiau baka ni ngajar.
“Tuju kami ke ngatur aum tu laban kami deka ke Opis Menteri Pelajar Malaysia (KPM), Opis Menteri Pelajar nengeri Sarawak sereta Opis Pelajar Nengeri Sarawak nemu sereta ibuhka bisi graduate dalam pelajar ke bedau diberi peluang ngajar.
“Kami ngambibidang tu ba universiti peribit ngambika diberi peluang nyadi penga- jar laban kami chukup rindu sereta deka nyadi pengajar, tebal entara kami ulih nyambung pelahar ngagai universiti perintah tang nulak laban deka nyadi pengajar.
“Nya alai nama kebuah nadai peluang enggau ruang diberi ngagai kami? Kami mega bisi nerima penerang, Opis Pelajar Nengeri Sarawak bisi ngambi graduate ke nadai latar belakang dalam bidang pelajar enggau nyereta Ujian Kecekapan Calon Guru (UKCG) apin lama. Kami enda nyamai ati laban mayuh sida ke ukai bidang pelajar diambi nyadi pengajar interim ba sekula,” ku iya.
Sanlos mansutka pekara nya dalam aum pengarang berita Hala Tuju Graduate Ijazah Sarjana Muda Pendidikan UNITAR, Sarawak ke digulu Kaban Kunsil Nengeri ( ADUN) Batu Kitang Lo Khere Chiang ba sebuah hotel ditu, kemari.
Raban graduate tu diarika Sanlos ngarapka piak bekaul ulih meri penerang kebuah ke enda dikanggau nyadi pengajar interim sekalika ketegal kurang peneleba? tauka engka bisi tegal bukai ke enda ditemu kami ari piak ke bekaul?
Ku iya, ketegal ke nadai peluang ngajar tauka gawa bepelasarka bidang ke diambi tebal raban graduate makai gaji dalam bidang bukai tang agi enda chukup dikena bebayarka PTPTN, ke belanja enggau ke bukai.
Bisi sekeda ari kami udah disenaraihitamkan laban enda ulih mayar baru PTPTN, taja niat ati endang deka mayar, ku iya.
“Kami ke ngatur aum tu ukai deka nyalahka sesapa tang laban kami minta diperati tauka dikeibuhka iya nya kami ke graduate dalam Ijazah Sarjana Muda Pendidikan bisi dikena ngisi pengawa puang enggau pengurang penyampau pengajar baka ti dijuluk YAB Kepala Menteri Kelima niang Pehin Sri Adenan Satem ke deka nisbah pengajar asal Sarawak enggau pengajar ari menua luar 90:10.
“Kami berasai temegah ati laban YB Lo deka datai enggau kami ngiga tauka mutarka penanggul tu lalu nyadi medium dikena nemu nama kebuah kami bedau diberi peluang,” ku iya lebuh bejaku ba aum pengarang berita nya. MIRI: Sekula Sekondari (SMK) Baru Miri komited nentuka semua kandang sekula nadai igi penyakit dibai nyamuk, iya nya denggi.
Prinsipal iya, Jerrah Pandin madah dikena nyapai juluk nya, raban sekula udah ngelancharka Kimpin ‘Patrol Denggi’ pengelama sebulan ngaul bala nembiak enggau pengajar.
“Kempen Patrol Denggi deka dipejalai pengelama sebulan ngaul 15 iku pengajar sereta 40 iku nembiak, sida tu deka nentuka kandang sekula nadai denggi,” ku iya rambau Pengawa Ngelanchar Kimpin Patrol Denggi SMK Baru Miri di balai sekula nya,apin lama udah.
Ku Jerrah nambah, sida mega deka bejalaika 30 aktiviti servis komuniti lalu pengawa nya deka dipejalai sekalika dalam kandang sekula tauka komuniti menua nya.
“Kitai dekaka nembiak nyadi duta denggi dikena ngerembaika penerang beguna ngagai bala komuniti pasal pemisa ketup nyamuk aedes sereta chara nyeliahka iya,” ku iya nerang.
Berindik ari nya, Jerrah ngarapka semua raban sekula nya seati sepenemu enggau bekerejasama ngemujurka kimpin nya sereta nentuka nadai rikod denggi nyadi di sekula nya.
“Semua raban sekula patut seruran beratika pemeresi sekula enggau nentuka nadai endur nyamuk aedes betelu,” ku iya nyemetak.
Iya mega meri puji ngagai bala pengajar enggau nembiak sekula ti udah ngaul diri bepekit Patrol Denggi.
Antara aktiviti bela diatur iya nya pengawa nyuaka setipikit ngagai Bintang Denggi sekula, lakun mandangka ‘hapuskan Aedes’,mutarka video ngemunaska Aedes enggau mandangka pengawa nagang denggi.