Sentang pekara tu nyema bisi siti aja ari komponen parti BN enggai nerima, sida endang enda ulih nyadi kaban BN: Masing

JULAU: Nadai jalai sida ke nyakal tauka bediri ngatika diri tau tama nyadi kaban Barisan Nasional ( BN) taja udah menang ba Pengawa Bepilih Besai Ke-14 (PRU14).

Pekara tu dibantai Sapit Kepala Menteri Tan Sri Dr James Jemut Masing maya iya ngulu program betemu enggau rayat ba Rumah Minggan Noel di Nanga Sayong ditu, ensana.

Ku iya, nyema taja siti ari komponen parti BN aja enggai nerima, sida nya endang enda ulih nyadi kaban BN.

“Peda baka Parti Rakyat Bersatu (UPP), parti tu siti ari parti politik ti begulai enggau BN. Tang nyentuk sehari tu sida empai diterima nyadi siti ari komponen parti BN,” pia ku iya madah.

Masing ti mega Presiden Parti Rayat Sarawak (PRS) madahka pekara tu dikena iya nimbal chara politik ke dikena chalun ngatika diri ba Parlimen Julau, Larry Sng Wei Shien ti madahka diri iya deka nyadi kaban BN nyema menang ba penuduk nya maya Pengawa Bepilih Besai tu.

Ku iya, iya udah nerangka pekara nya ngagai Sapit Menteri Besai Datuk Seri Dr Ahmad Zahid Hamidi enggau Kepala Menteri Datuk Patinggi Abang Johari Tun Openg.

“Seduai bela besetuju enda nerima chalun ukai ari BN tama nyadi kaban BN taja udah menang bepilih.

“Chalun BN ba Parlimen Julau iya nya Datuk Joseph Salang, ti siku ari kaban BN lalu iya enda ibuh minta diri nyadi sebagi ari BN.

“Enti iya mega, iya ulih nandu tanggungpengawa mai pemansang ngagai rayat ditu,” ku iya madah baru.

Salang dikeandalka PRS ngetanka penuduk Parlimen Julau ungkup penggal kelima dilaban Larry ti datai ari Kapit.

Ku Masing, iya endang udah ngelala Salang kenyau ari nyadi Sekretari Besai PRS ari taun 1983.

“Iya orang ti manah taja enda tentu bemunyi.

“Nya alai sukung iya ba PRU ngambika nyadi pengari rayat kita baru,” pia ku iya.

Bekaul enggau perambu mensia mayuh sentang Salang ti deka dichiri nyadi menteri penuh nyema menang ba PRU14 tu, ku Masing nya bepanggai ba rayat di Julau empu.

“Enti kita deka meda iya nyadi menteri penuh, beri sukung ti kuat ngagai iya.

“Tang, enti Salang semina bulih majoriti ke mit, nya mandangka rayat ditu enda bebendar nyukung iya,” ku iya nerang.

Peda baka Parti Rakyat Bersatu (UPP), parti tu siti ari parti politik ti begulai enggau BN. Tang nyentuk sehari tu sida empai diterima nyadi siti ari komponen parti BN. Tan Sri Dr James Jemut Masing Sapit Kepala Menteri