48,570 penerima bantu JKM nerima pemeri khas program Sejambak Kasih
SARIKEI: Sepenyampau 48,570 iku penerima bantu ninting bulan ari Opis Pengelantang Pendiau Mensia Mayuh ( JKM) di serata nengeri nerima pemeri khas di baruh program Sejambak Kasih nyerumba hari besai begembar ti deka datai.
Nitih ku Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit, Datuk Seri Fatimah Abdullah, 31,695 tauka 56.17 peratus ari penerima datai ari komuniti Dayak ti deka ngintu Gawai kena 1 Jun lalu 16,875 penerima (29.91 peratus) komuniti Islam ti deka ngintu Hari Raya Aidil Fitri dalam tengan bulan Jun.
Sida tu antara semua penyampau 56,424 dalam lis pemadu baru rejista bantu pengelantang di serata nengeri, ku iya, lebuh bejadi pengawa nyua pemeri hari besai di Palan Aktiviti Serakup ditu, kemari.
Bala penerima bantu pengelantang ninting bulan di nengeri tu nambah ari 56,621 dalam taun 2015 ngagai 57,588 taun nyin tadi, ku iya madah silik.
Naka bulan March taun tu, bisi 56,424 penerima ari mayuh bengkah kategori bantu di serata nengeri, ku iya, seraya nambah, sepenyampau RM52,421,950 bantu udah dibayar dalam timpuh tiga bulan tu.
Bagi Menua Sarikei bisi 2,571 iku penerima bantu pengelantang ti udah nerima bayar ari opis sepenyampau RM2,334,950 ungkup tiga bulan keterubah taun tu, ku iya, seraya nambah, 2,098 datai ari 1,477 Dayak enggau 621 Melayu nerima pemeri hari besai sida kemari.
Taja pia, 180 iku ti bisi dikangau datai nerima bantu mata guit hari besai rambau atur pengawa kemeri, nerima hamper berega RM50 siti.
Baka bantu pengelantang ninting bulan, pemeri hari besai tu dikena ngelempungka tating belanja ngagai raban seranta, ku Fatimah.