Ketuai politik enggau tuai rumah ari Kapit nyaup bekimpin ke BN di Julau

JULAU: Mayuh bala ketuai politik enggau bala tuai rumah ari Kapit nurun ke Julau nyaup Barisan Nasional (BN) bekimpin ba parlimen nya.

Penatai sida tu dikena nentuka rayat dia ngambika enda ngaga pemutus ke salah, ngundi chalun ngatika diri, Larry Sng Wei Sien.

Chalun BN Parlimen Julau Datuk Joseph Salang mantaika pekara nya maya iya nemuai ngagai Rumah Entili, Nanga Stusol enggau Rumah Ukon, Punggang Batang ditu, ensana.

Iya madah, sida ke datai nyaup bekimpin tu nyengkaum Sapit Kepala Menteri empu, Tan Sri Dr James Jemut Masing ti mega Presiden Parti Rayat Sarawak (PRS) sereta Kaban Kunsil Nengeri ( ADUN) Baleh, ADUN Belaga Datuk Liwan Lagang enggau ADUN Pelagus Wilson Nyabong.

Kelimpah ari nya, ex-kunsilor Jackson Melintang bela nguluka bala tuai rumah datai nyaup kimpin Salang.

“Ari tu kitai meda, sida enggai meda rayat di Julau merinsa baka sida ba pengelama 20 taun.

“Apai Larry, Datuk Sng Chee Hua kala nyadi ADUN Pelagus sebedau diganti Larry dua penggal.

“Udah nya, Larry diganti bala iya George Lagong,” pia ku iya madah.

Salang ti mega Ketuai Sekretari PRS madah, taja Larry enggau apai iya (Larry) pengari rayat BN suba tang seduai enda mujur bejalaika tang- gungpengawa ngagai rayat.

“Udah nya ditambahka agi enggau penatai George sepengudah ke menang maya DUN Pelagus ba Pengawa Bepilih Nengeri (PRN) taun 2011.

“George ti bediri nengah tikit ngatika diri bela enda mujur megai rayat laban iya nadai puku dikena ngaduka pemansang ngagai rayat,” ku iya nerang.

Berindik ari nya, Salang enggai rayat di Julau saru pilih baka ngujungka diri tau napi pengerugi lima taun.