Diskaun nya dikearapka ulih ngelempung tating belanja rayat ke kena bungkur skim SPS enggau skim ngemesai genturung pendiau
KUCHING: Perintah Nengeri meri diskaun 50 peratus ungkup bayar premium tanah berengkah 6 Mei di serata Sarawak.
Pekara nya dibantai Kepala Menteri Datuk Patinggi Abang Johari Tun Openg ba penemuai kereja di palan Projek Pemansang Darul Hana di Kuching ensanus.
Ku iya, sebedau tu bayar premium tanah iya nya ba penyampau RM5,000.
“Ba penemuai aku ke Maludam pagi tadi (ensanus), aku mendingka sebana peranak di genturung pendiau nya ti mayar premiun tanah ba penyampau RM5,000.
“Berindik enggau nya aku meri diskaun 50 peratus ungkup premium tanah tu ke alai orang ngempu tanah semina mayar RM2,500 aja lalu atur tu deka diterit berengkah sehari tu (ensanus) di serata Sarawak,” ku iya.
Ba penemuai aku ke Maludam pagi tadi (ensanus), aku mendingka sebana peranak di genturung pendiau nya ti mayar premiun tanah ba penyampau RM5,000. Datuk Patinggi Abang Johari Tun Openg Kepala Menteri Sarawak
Nambahka nya ku Abang Johari, perintah udah ngenuku chara baru ba pengawa numbuhka skim pengentap genturung pendiau ke alai semua ungkus ngaga sistem parit, jalai alun enggau pengawa nimbuk tanah deka ditanggung perintah.
Nitihka penerang ke dikeluar Opis Kepala Menteri kemari, putung 50 peratus tauka RM2,500 sa’iti lot nya mungkur skim pengentap pendiau (SPS) enggau skim ngemesai genturung pendiau.
Putung dikearap ulih nge- lempung tating belanja rayat ke kena bungkur kededua skim.
Putung 50 peratus nya mai pemaik ngagai rayat ba semilan bengkah skim iya nya SPS Stampin Fasa 1, Stampin Fasa 2, Stampin Fasa 3, SPS Batu Kawa 2 Fasa 1, SPS Batu Kawa 4 Fasa 2 Renggat II (Islam), SPS Batu Kawa 4 Renggat 2 (ukai Islam), SPS Batu Kawa 4 Fasa 3 enggau SPS Stapok.
Semua semilan skim nya mungkur 2,834 lot rumah lalu meri empas pekara wang ngagai perintah ba penyampau RM7.085 juta.
Opis Kepala Menteri nengah surat penerang berita nya mega netapka perintah setuju mayar pulai premium ke udah dibayar dulu agi ari tu ke ngelui RM2,500.