Pekit Olimpiad Sains enggau Matematik mantu nempa nembiak sekula landik ba kededua subjek

KUCHING: Pekit Olimpiad Sains enggau Matematik mantu nempa raban orang ke landik ba kededua bengkah pelajar, ku Menteri Muda Pelajar enggau Pansik Teknologi Dr Annuar Rapaee.

Kelimpah ari nya ku iya, pekit mega meransang nembiak sekula rinduka kededua bengkah pelajar.

“Nengah pekit tu kitai ulih mandingka pemandai nembiak dalam kandang mengeri enggau sida ke diau di menua pesisir ba sains enggau matematik.

“Pemutus pekit mandangka bida nya enda jauh lalu tu mega mandangka tusun pelajar kitai mai pemaik ngagai nembiak sekula,” ku iya.

Annuar mansutka jaku nya ba pengawa nyuaka perais Pekit Olimpiad Sains enggau Matematik, Piala Kepala Menteri 2018 di Indu Opis Pelajar Nengeri di Jalai Diplomatik ditu, kemari.

Bisi 100 buah sekula di serata Sarawak ke mungkur penyampau 870 iku nembiak masuk pekit ke diatur nengah kerejasama Opis Pelajar Sarawak enggau Gagasan Pendidikan Melayu Malaysia pampang Sarawak.

Ba Pekit Olimpiad Sains enggau Matematik, gelar champion kategori sains pulai ngagai Nazmi Ahmad Nizar ari SM Sains Kuching utara ke alai iya nerima perais mata duit RM1,000.

Penuduk lumur dua eng- gau tiga pulai ngagai Khairul Hasli Mahli ari SMK (Agama) Tun Ahmad Zaid enggau Qaedi Fakharul Merudi ari SMK (Agama) Miri ke alai seduai nerima RM700 enggau RM500.

Ungkup kategori Matematik gelar champion pulai ngagai Jesslynn Loo Shi Lin ari SMK Methodist Sibu, lumur dua Emilie Wong Sing Yee ( SMK Padungan) enggau Valerie Lee Sze Ying (SMK Green Road).

Champion kategori matematik nerima RM1,000, lumur dua (RM700) lalu lumur tiga (RM500).

Semua perais disua menteri Kereja Raya ke mega Presiden Gagasan Pendidikan Melayu Malaysia.