Baru deka nemu niat perintah ngemendarka agih belanja nyerumba hari muai undi
KUCHING: Pengawa ngemendarka agih belanja sepenyampau RM57 juta dikena ngangkatmanahka Pasar Selangau apin lama ke udah, iya nya berita manah ngagai peranak Selangau.
Nitih ku chalun Parti Keadilan Rakyat (PKR) di Selangau, Baru Bian, maya ngemendarka nya nyerumba pengawa muai undi nyadi tanda tanya ba pengelurus enggau niat perintah nengeri.
“Taja pia, aku berasai lantang ati laban Selangau udah nerima perati lalu aku deka ngelalau peranak Selangau mantaika sebana sida inggar sereta terang agi ngichaka dan tingkar ke baka nya majak nyadi dalam timpuh dua hari agi sebedau hari muai undi.
“Nyata amat, parti Barisan Nasional (BN) terus ngaga semaya manis sida laban nadai mayuh pemujur ulih dipandang di Selangau pengudah megai penuduk nya bepuluh taun pengelama, nya alai sida enda ulih bekimpinka pemanah rikod pengawa ke udah digaga sida,” ku iya nengah penerang berita kemari.
Kepala Menteri Datuk Patinggi Abang Johari Tun Openg kena Hari Enam nyin tadi ngemendarka agih belanja sepenyampau RM57 juta dikena ngangkatmanahka Pasar Selangau.
Agih belanja tu nyengkaum RM8 juta dikena ngaga Komplek Mit Lumba enggau Main Selangau, RM5 juta dikena kereja ngaga landskap tebing ai Selangau, RM2 juta dikena kereja ngangkatmanah Jalai Kemena-Balingian sepanjai 5km, RM17 juta dikena kereja ngangkatmanah Jalai Siong Ili (16.5km), lalu RM25 juta dikena kereja ngangkatmanah Jalai Kelebu ngagai Rumah Ado.
Abang Johari mega bisi ngemendarka pengawa ngaga Palan Transformasyen Menua Pesisir (RTC) Selangau besemak enggau Jalai Besai Pan Borneo sereta balai makai ungkup Sekula Primari Bansa China (SJKC) Tong Ah sebuah sekula bansa China di Selangau.
Baru, ke nyadi Chairman PKR Nengeri madahka peranak Selangau bisi peluang milih pengari baru kena 9 Mei tu, sereta bejalaika pengawa diri mai ubah ngagai menua.
“Sekalika sida deka nerima mayuh agi semaya tauka sida deka ngundi ungkup ubah? engka mayuh tanya bekaul patut dibantai: sida deka dikemendar ngaga pilih nitihka peneka diri, tauka sida deka dipejal ba mayuh macham pekara enggau tikas? Ari ulah ngerusak atur program aku, BN ngemba rayat ngambika nangi sereta takut.
“BN patut mantaika ulah sida, lalu nyata kamah. Aku minta peranak Selangau, sereta semua peranak Sarawak, ngambika berani nulak gaya ulah BN ti kamah tu.”
Baru madahka lampu jalai dipadam lalu restoran ke bisi ngelingi ditinggalka petang kelimpah sekeda endur muak ke kiba balai Sekuau bisi terang lebuh atur iya meri licha politik di sebuah balai di Sekuau, malam Hari Minggu tu tadi.
“Aku bisi dipadah ke alai bekal kuasa karan udah dipadam bala staf Balai Sekuau. Kami mujur ngulihka bekal kuasa ungkup ‘loud speakers’ ari sebuah restoran ti bisi kuasa karan lalu licha kami berengkah urung pukul 7.15 lemai.
“Sekeda peranak bisi mansutka jaku sebedau aku dipinta bejaku. Lebuh aku angkat bejaku, bekal kuasa karan diputus lalu kami diau dalam petang.
“Kami telefon nuju hotline Sesco, dipadah sida deka mansik lalu telefon baru. Pengudah 30 minit, kami telefon baru ngagai Sesco, lalu kangau nya disaut siku kaban staf ti manah sereta profesional, udah nya telefon baru madah ngagai kami penanggul kuasa karan putus ketegap penanggul wayar bisi betegu.
“Lebuh beratika jam penanggul nyadi sebaka enggau penanggul wayar bisi betegu, simpul penemu ti ulih disagam ke alai atur pengawa kami udah dikachau.
“Aku enda ulih bejaku,” ku iya nimbal.
Baru madahka tu ulah ngachau ti nadai bebasa sereta kasar tu ngayanka pengirau BN ba penuduk sida, lalu sida tinggi jaku ngelama tu nyadi ‘towkay’.
“Patut nyadi teladan ngagai kitai peranak Sarawak ke alai orang tu ti deka dipilih nyadi ketuai kitai kelalu nadai basa, nadai ngira pengamah chara dikena sida ti dikemataka pengundi, penemu raban ti patut dikira sida.
“Ulah tu patut dikutuk bala ketuai BN enti sema sida deka ngayanka pengawa bepilih tu lurus sereta nadai dikeruga. Taja pia, aku melabaka sida ningkah madahka enda nemu pasal ulah ngerusak tu.
“Kitai enda patut tekenyit laban BN udah betaun salah nguna kuasa ngujungka sida nulak bepekit ngena chara ke lurus lebuh bemain. Baka BN di Semenanjung Malaysia, BN di Sarawak udah lenyau ‘moral compass’, lalu patut diberi awak belepa ari merintah Sarawak ti mandangka integriti sida majak lenyau lalu ngemetulka baru sistem sida.