Sarawak nengeri pemadu meratka pekara bekait STEM

KUCHING: Sarawak nyadi nengeri ke pemadu regas ba atur ngelaku pekara ke bekaul enggau Science, Technology, Engineering enggau Mathematic (STEM), ku Menteri Kereja Raya Dato Sri Fadillah Yusuf.

Kelimpah ari nya ku iya, ba tetiap program, Sarawak mega entara nengeri ke pemadu mayuh nganjung penyereta.

“Kitai meratka STEM ngambi ulih meransang nembiak rinduka bengkah pelajar tu.

“Diatu penyampau nembiak ke ngambi bengkah pelajar ke bekait enggau STEM di universiti mengkang kurang ari 60 peratus.

“Ketegal nya kitai keran matak nembiak di sekula rinduka STEM, ku iya.

Fadillah mansutka jaku nya rambau ngulu pengawa nyuaka perais Pekit Olimpiad Sains enggau Matematik, Piala Kepala Menteri di Indu Opis Pelajar Nengeri di Jalai Diplomatik ditu, kemari.

Pekit diatur nengah kerejasama Opis Pelajar Sarawak enggau Gagasan Pendidikan Melayu Malaysia pampang Sarawak.

Iya nambah, dikena ngembing juluk nyadi menua mansang, pengawa pansik enggau pemansang meseti mayuh agi digaga.

“Diatu menua kitai nyadi menua ti begunaka barang, ambika chunto kitai mayuh meli telefon binching ari menua luar. Kitai meli semua barang di makit luar tang kitai enda mansutka produk diri.

“Enti kitai deka nyadi menua pemansut barang, kitai meseti ngaga mayuh pengawa pemansik enggau pemansang lalu ketegal nya kitai meseti nempa modal mensia ke landik ba STEM,” ku Fadillah.

Ba pengawa kemari, Fadillah ke mega Presiden Gagasan Pendidikan Melayu Malaysia bisi nyuaka perengka projek National Geographic STEM ngagai enam buah sekula primari enggau sebuah sekula sekundari.

Sekula primari ke masuk program iya nya SK Agama Datuk Abdul Kadir Hassan, SJK Semerah Padi, Sk Gita, SK Rakyat Tupong enggau SK Combined, SK Merpati Jepang.

SMK Petra jaya dipilih ngarika sekula sekundari ba projek National Geographic STEM.

Bela datai Menteri Muda Pelajar enggau Pansik Teknologi Annuar Rapaee enggau Direktor Pelajar Sarawak Rakayah Madon.