Undi mih chalun ke disabung perintah nengeri kena 9 Mei

SARIKEI: Bala pengundi menua tu diansak ngundi chalun disabung perintah nengeri maya hari muai undi 9 Mei tu.

Chalun Barisan Nasional (BN) ari Parti Sa’ati Rayat Sarawak ( SUPP), Dato Sri Huang Tiong Sii, ti udah dikeandal ngerampas pulai penuduk Sarikei ari penyakal madahka Kepala Menteri, Datuk Patinggi Abang Johari Tun Openg begunaka sukung tegut ari peranak Sarawak dikena ngatur randau nagih hak Sarawak di baruh Sempekat Malaysia 1963 (MA63) ti udah lenyau.

Perintah Nengeri begunaka pengari ti kering ba renggat perintah besai ngambika iya teulihka pemujur ba atur agenda beguna amat, ku iya ma- dah nyemetak rambau bekimpin ditu, malam Hari Minggu tu tadi.

Iya pechaya ka majoriti peranak Malaysia nyukung perintah BN belalauka pemanah pengawa sida ngintu peminta rayat nadai ngira bansa tauka pengarap, ku iya, seraya ngelalau rayat anang muntang mendingka tuduh bula dipansutka penyakal ngelaban perintah enggau bala ketuai BN.

Kaban Kunsil Nengeri (ADUN) Repok mega nangkan rayat mayuh projek pemansang deka dipejalai pulaika penguntung rayat, kelebih agi sida ke diau di Bagi Menua Sarikei.

Siti ari projek besai deka ditinda enda lama agi baka udah dikemendarka Kepala Menteri apin lama ke udah iya nya 17-kilometer Jalai Sungai Pasi ngagai Tanjung Manis/Sibu beungkus RM450 juta nyengkaum ngaga 1.28-kilomter jematan meraka Batang Rejang, ku iya madah silik.

Kelimpah ari nya, perintah mega bisi perambu besai dikena ngubah Sarikei, Meradong enggau pelilih menua besemak diangkat nyadi hub-betanam betupi, ku iya.