Projek ngangkat manah simpang Sepupok ulih mutar isu jalai sekut
SEPUPOK, NIAH: Perambu ngangkatmanah simpang Sepupok, beungkus RM3.5 juta deka mutarka penanggul jalai sekut di jalai tebing tasik Niah.
Menteri Muda Jalai Tebing Pantai Sarawak, Datuk Julaihi Narawi madahka perintah udah ngiga chara ngulihka belanja ungkup projek ngangkatmanahka Simpang Sepupok.
“Projek tu nyengkaum pengawa nangkir jalai, ngelekatka lampu trafik, lampu jalai enggau ngelai jalai ngena ‘system All weather thermoplastic road marking,” ku iya rambau Program Meri Penerang Projek Infrastruktur enggau Pengawa Ngintu Jalai Tebing Tasik Di Sitak Sibuti, Miri, kemari.
Julaihi madah, kelimpah mutarka penanggul jalai sekut, jalai nya mega deka disambung ngagai Jalai Besai Pan Borneo ti benung ba renggat digaga diatu.
“Peranak di Niah/Sepupok mega deka ulih ngasaika mayuh pemansang ti dibai pengudah Jalai Besai Pan Borneo tembu digaga jemah,” ku iya nerang.
Julaihi ti mega Kaban Kunsil Nengeri (ADUN) Sebuyau madah kelimpah ari rentayan Jalai Pan Borneo, perintah mega dalam perambu deka ngangkatmanahka rentayan Jalai Tebing Pantai.
“Aku ti nyadi Menteri Muda (Jalai Tebing Pantai) diberika pangku pengawa besai amat ngambi ngangkatka rentayan jalai alun ti deka nyambung Nengeri Sarawak ari Lundu, Asajaya, Sadong Jaya, Sebangan, Sebuyau, Pusa, Kabong, Daro, Matu, Kuala Balingian, Bintulu datai ke Miri, semua disambung enggau rentayan Jalai Tebing Pantai,” ku iya.
Ku Julaihi nambah, Rentayan Jalai Tebing Pantai tu nyadi peransang ngagai pemansang menua pesisir enggau pasar mit di tebing pantai iya nya deka ngurangka belanja pengangkut sereta logistik ungkup dagang asil tasik sereta mega betanam betupi peranak di kandang tebing pantai.
“Ari pemisi rentayan jalai tebing pantai tu ila pedagang indsutri tau ngulihka bekal mata enggau jampat agi asil lalu belanja pengangkut ekonomi agi,” ku iya.
Perintah nengeri pechaya ari pemisi rentayan Jalai Tebing Pantai tu peranak Miri ulih ngasaika mayuh pemansang enggau bisi tambah ba awak dagang enggau kereja dikena ngerichahka agi sosio-ekonomi dudi hari.
“Perambu ngangkatmanahka renyatan Jalai Tebing Pantai udah dipejalai kenyau ari taun 2017 lalu dipelaba begunaka timpuh lima taun nembuhka iya.
“Nitihka timpuh ditetap, rentayan Jalai Tebing Pantai tu dipelaba deka tembu dalam taun 2023,” ku iya.
Ku iya, batang tuju perintah ngangkatmanahka rentayan Jalai Tebing Pantai tu dikena nyambung 36 peratus ari peranak Nengeri Sarawak ti diau mendam di sepanjai Jalai Tebing Pantai ari Selatan nyentuk Utara Sarawak, (Sematan ke Miri).