Ukai semina mantu ngulihka belanja tambah tang mega tau meri peneleba ngagai sida ke baru bedagang
MIRI: Bazar Gawai Dayak (BGD) ke diatur Gagasan Anak Dayak Sarawak (GADS) ninting taun ulih nyadi pelasar ti manah ukai semina mantu bala kaban komuniti Dayak ngulihka belanja tambah aja, tang mega meri awak ngasaika peneleba bedagang ngagai sida ti deka ngaul diri ba pengawa dagang.
Nitih ku Menteri Muda Dagang Temuai, Seni enggau Main Asal, Datuk Lee Kim Shin, ukai muntang deka nyadi orang dagang enti sema orang nya nadai entu ngembuan peneleba nyata ti diasai lalu semina bepanggai ba teori bup teks aja.
“Enti kita deka ngepunka dagang nyata, enda chukup semina bepanggai ba teori bup teks aja laban kita mega patut ngasaika peneleba makit ti nyata.
“Bala kita patut ngembuan peneleba praktikal lalu peneleba tu ulih diasai nengah program baka Bazaar Gawai Dayak,” ku iya lebuh bejadika Pengerami Nganchau Tikai Bazar Gawai Dayak Miri 2018 kena malam Hari Minggu tu tadi.
Sama bisi datai ngulu pengerami iya nya Datuk Bandaraya Miri, Adam Yii, Sapit Presiden GADS Kelvinsan Macringgai enggau Chairman Pengatur, Ganda Anyum.
Dalam jaku dipansutka iya, Lee mega meransang GADS ngatur program latih dagang ungkup raban nembiak Dayak, dikena mantu sida ngaul diri dalam dagang.
“Kitai diatu dalam jeman digital lalu tu chukup manah enti GADS ulih ngatur latih ti meri fokus ba pekara tu ungkup raban nembiak Dayak.
“Ari latih bansa tu, raban nembiak Dayak ulih matau sereta nguji dagang online ti nyadi gaya dunya kemaya hari. Tu jalai mansang ke mua,” ku iya.
Ku iya, nyauka tetiap industri bekenaka teknologi digital lalu tu pekara ti enda ulih diseliah/dikelaung.
“Perengka pengangkut mensia mayuh baka Grab mega bekenaka teknologi digital.
“Nya alai, enti enda nitihka singkang teknologi digital, kita deka tinggal di belakang,” ku iya madah nyemetak.
Ba lansa bukai, tu taun keempat Bazar Gawai Dayak Miri.
Bazaar berengkah ari 2 Mei nyentuk 26 Mei ti ngaul 45 buah bangsal bejualka bema- cham bansa pemakai Dayak, asil jari enggau barang dagang ke bukai.
Iya mega ngelaluka bala patron pengerami ngambika nyepi penyamai bemacham bansa pemakai asal Dayak, seraya mantaika pemakai enggau main asal Dayak ngagai komuniti luar.
Bemacham aktiviti mega deka diatur nyerumba bazar tu nyengkaum main rayat, panggau pemerindang, pekit ngajat ungkup orang besai tuai enggau nembiak mit, beperindang enggau muzik Sape, Pekit Gawai Dayak Idol II, Band Fest Showcase sereta program pemerindang ari bala artis Iban.
Batang pengerami bazar iya nya Bejalai Bebala Mayuh Gawai Dayak diatur kena 26 Mei ti deka disereta bala kaban komuniti Dayak selampur Miri.
Pengerami tu deka nyadi kelai nutup bazar, ditambah bala pesereta bejalai bebala mayuh ti bekenaka ngepan asal sida.