Nanta ngelalau Paren anang bejaku bula maya bekimpin

KAPIT: Chalun Barisan Nasional (BN) ari Parti Pesaka Bumiputera Bersatu (PBB) di sitak Parlimen Kapit Datuk Alexander Nanta Linggi nangkan chalun penyakal, Paren Nyawi, anang naburka penerang bula ba kimpin iya.

Nanta dipinta nimbal isu penanggul kuasa karan tejanggal di Kapit kena 1 Mei tu tadi, iya nya berengkah ari pukul 2.30 lemai nyentuk 11.30 pagi hari siti.

“Aku berasai chukup asa ari tuduh digaga Paren Nyawi, chalun ari Parti Tindakan Demokratik (DAP) di Kapit laban lebuh penanggul kuasa karan tejanggal kena 1 Mei, endang enda disadang ketegal bala kunteriktor ti bisi ngatur sekeda kereja ba jalai.

“Sida nadai nitihka atur ti patut ba pekara SOP bekereja enggau raban SESCO ba penerang ke alai sambung tali karan ke bisi di taba projek (tali karan dalam tanah).

Sida netak nengah jalai sereta netak tali karan besai ngujungka bekal kuasa karan nyauka 24 jam tejanggal di Kapit.

“Mayuh peranak ringat nyengkaum aku empu,” ku iya madah nyemetak pengudah bejadika Karnival Usahawan Desa 2018 di Kapit (KUD@ Kapit 2018) diatur di laman Fort Sylvia enggau Jalai Kubu Lama ditu.

“Tang nama kebuah DAP mansutka penerang bula lalu nuduh aku sengapa. Iya madahka penanggul tu nyadi ketegal Alexander.

Aku bisi ditu lebuh penanggul nyadi lalu udah bejalaika tanggungpengawa diri sereta udah ngangauka raban bekaul, nyengkaum madah ngagai Menteri Bekal Ai enggau Elekterik Menua Pesisir Datuk Sri Dr Stephen Rundi Utom pasal penanggul tu,” ku iya nerang silik.

“Paren enda nemu pengawa ti udah digaga aku dikena mutarka penanggul tu kelimpah tuduh ti nadai bebatang.

Nya alai, aku mega deka nanya, nama chara iya mutarka penanggul tu? Anang semina nemu melit pekara ti nyadi,” ku Nanta. Ngelansa pasal KUD@Kapit 2018, ku Nanta, program tu nyendiaka awak ungkup pedagang menua tu mantaika produk sida.

“Program tu diatur dikena nyediaka awak ngagai bala pedagang menua tu mantai produk sida, baka asil produk menua tu, kraf jari sereta mega barang pemakai. Ari pengawa bejual tu sida ulih ngiga belanja.

“Ari perati aku, bala sida bepenanggul ba pengawa bejualka produk ngagai makit besai di luar Kapit ketegal beberapa kebuah. Tungkus kelalu rumpas. Ari KUD ti ngaul MARA enggau ejensi bukai di baruh Opis Menteri Pemansang Menua Pesisir enggau Kandang Menua (KKLW), bisi program dikena mantu pedagang menua pesisir, nyengkaum nungkus produk, nentuka bisi kualiti sereta produk nya ulih diterima dalam makit.

Tu mega deka nambahka rega produk,” ku Nanta.

Ku Nanta, bisi mega program dikena ngembing sida ngagai makit besai agi. Program tu udah mujur amat dipejalai di Semenanjung ngelama tu, nya kebuah ungkup Sarawak, nyadi sapit menteri KKLW, iya ngemai program nya kia ngambika peranak menua pesisir kelebih agi di Kapit bela teulihka pemaik.

KKLW ngatur program tu dikena nerenak rinduka pengawa dagang menua pesisir ngagai sida, nerima penerang enggau bantu ti patut nyengkaum belanja ari bemacham ejensi lalu tu batang tuju KUD@Kapit 2018 taun tu, ku Nanta nampung.

KUD@Kapit 2018 diatur dua hari berunggu, berengkah ari Hari Lima ngagai Hari Enam mujur matak penyereta bala pedagang ari Kapit enggau ari luar, mandang sereta bejualka produk sida.

Bala sida ngerebut awak disediaka KUD@Kapit dikena ngelakuka penyelai produk diri. Mayuh ari sida teulihka penguntung ari mayuh bansa kus enggau workshop ti diatur GiatMARA lalu nerima bantu belanja ( dikena ngepunka dagang) ari Majlis Amanah Rakyat (MARA).

Perintah nengah KKLW mega bisi ngagihka belanja besai dikena ngenegapka pedagang ngaul diri dalam dagang. Ba atur program nya, Nanta bisi nyuaka bantu Program Perumahan Rakyat Termiskin ( PPRT), Program Peningkatan pendapatan (PPP), Pinjaman SPED NANO sereta mega perais chabut tikit benasit.

Program dua hari berunggu mujur matak 50 buah bangsal mandangka produk rumah ari pemakai, kek, produk betupi, pua kumbu, baka’ digaga ari kraf jari enggau ke bukai.

Sapit Ketuai Skretari KKLW Hajah Norisan Ramli, Sapit Ketuai Sekretari Perintah Nengeri Sarawak Datu Samion, Residen Kapit Joseph Belayong antara urung 1500 iku sida ke bisi datai ngulu program nya.