Perintah ngemendarka RM173 juta ungkup projek pemansang di Igan

MUKAH: Kepala Menteri Datuk Patinggi Abang Johari ngemendarka semua projek pemansang ke manggai RM173 juta ungkup sitak Igan rambau penemuai iya ensana ngagai Pasar Lama Igan.

Antara projek nya iya nya ngaga begunan kompleks betenam betupi, ngaga begunan Opis Pelilih Matu, jalai alun Igan-Kebuwau enggau nukar batang paip besai di sitak nya.

Kelimpah ari nya, projek tu mega mungkur projek ngaga jalai alun Igan ngelawa Sungai Elas, ngaga balai komuniti Igan, taba kaul Igan, ngaga Masjid Matu, sereta ngaga andau semin di Kampung Tian.

“Tu projek ti udah dikemendar lalu deka dipejalaika kitai di sitak tu,” ku iya rambau Program Tinjauan Mesra ensana.

Pengawa matau semua projek ti udah dikemendar nya deka dipejalaika iya empu ari atur pejalai gawa udah tu.

“Aku empu deka berati sereta bejalai ngabas baru sitak tu,” ku iya.

Berebak enggau nya, iya mega madahka projek pengentap pendiau baru ti deka dipejalaika perintah nengeri di serata Sarawak nitihka format baru.

“Projek pengentap pendiau baru tu deka nitihka format chara aku, chara baru,” ku iya nerang.

Chara baru tu ku iya nyengkaum ngisi tanah enggau ngaga entali ai ti manah agi sebedau lot tanah diberi ngagai sida ti ngempu.

Ungkus ngisi tanah enggau sistem entali ai nya deka dipelanja perintah nengeri.

Nyerumba program nya, Abang Johari mega bisi nyuaka geran lot asal sereta nyerahka lot bangsal ngagai pedagang di pasar Lama Igan.

Sama bisi datai kaban Kunsil Nengeri ( ADUN) Jemoreng Datuk Dr Juanda Jaya, ADUN Daro Safiee Ahmad, ADUN Balingian Abdul Yakub Arbi sereta chalun Barisan Nasional (BN) ungkup sitak Parlimen Igan Ahmad Johnie Zawawi.