Nya alai Perintah besai baru dikearap terus berat sereta enda nyiping pengajar, nembiak kelebih agi di Sarawak
KUCHING: Perintah besai baru dikearap terus berat sereta enda nyiping pengajar enggau nembiak kelebih agi di Sarawak.
Presiden Gerempung Pengajar Sarawak (STU) Jisin Nyud madahka laban Gerempung Pengajar Sarawak (STU) seruran meri sukung ngagai perintah ti merintah enda ngira sekalika ba renggat nengeri tauka perintah besai.
Iya madah, naka ke diatu STU bisi kaul ti manah enggau perintah nengeri, menteri renggat nengeri sereta perintah besai kelebih agi bekaul enggau pelajar.
“Kitai sebuah menua ti ngemeranka sistem demokrasi, kitai ke nyadi rayat patut ulih nerima enda ngira bagi parti politik ke merintah laban tu dipilih rayat.
“Tang ke pemadu beguna perintah enda tau enda berat sereta enda nyiping pengajar enggau nembiak,” ku iya.
Jisin meri penemu pasal pekara nya lebuh dipinta Utusan Borneo ngenang sereta madahka pekara ti dikearapka ba iring perintah baru menua.
Bejaku baru, iya madah bepelasarka pekara ti nyadi diatu endang nyata pengajar enda ulih mekuh penuh ngagai Pengawa Ngajar enggau Belajar ( PdP) dalam kelas.
Ku iya, STU amat ngarapka pengawa bukai ti begunaka mayuh jam ngereja pengawa baka pengawa online ti enda tentu beguna ke enda tau enda dikereja, ambika chunto baka survei enggau data ti ulih diambi ari data sekula enggau opis, ulih diputarka.
“Nama ke patut digaga pengajar iya nya semina ngajar aja, nya baru pengajar ulih merambu nama utai ti deka diajar enggau manah dikena nentuka proses PdP bejalai enggau lanchar sereta nadai pekara bukai ngachau.
Berebak enggau tu, Jisin ti ngarika STU mega madahka pengawa ngajar enggau belajar begunaka kereban Teknologi Pemadah ( IT) ti moden dikena PAK Ke- 21.
Iya ngarapka perintah enggau kabinet baru ba renggat perintah besai ulih mutarka penanggul nyengkaum pasal isu kereban, infrastruktur enggau internet ke nyadi ba nengeri tu ke pemanah proses PdP.
“Nyadi siku veteran dalam bidang politik enggau pelajar, STU pechaya Tun Mahathir ke nyadi Menteri Besai ulih nempa sereta mulaika penyulut bidang pelajar enggau pengajar di Malaysia.
“STU mega ngarapka perintah besai diatu ulih ngamatka pekara ti bekaul enggau pelajar ba Sarawak baka ke udah ditulis dalam Manifesto Pakatan Harapan,” ku iya.
Kitai sebuah menua ti ngemeranka sistem demokrasi, kitai ke nyadi rayat patut ulih nerima enda ngira bagi parti politik ke merintah laban tu dipilih rayat. Jisin Nyud Gerempung Pengajar Sarawak (STU)