Ngulih pulai hak S’wak dalam MA63 pekara ti pemadu dikemeratka BN Perintah Nengeri: Nanta
KUCHING: Ngulihka pulai hak Sarawak ke udah majak lenyau baka ti ditulis dalam Sempekat Malaysia 1963 (MA63) tetap nyadi batang tuju pemesai Barisan Nasional ( BN) nengeri ba perintah besai.
Sekretari Besai Parti Pesaka Bumiputera Bersatu ( PBB) Datuk Alexander Nanta Linggi madah, PBB nyukung penerang Kepala Menteri Datuk Patinggi Abang Johari Tun Openg ti deka bekerejasama enggau perintah besai.
“Kitai nyukung penemu YAB Kepala Menteri ti mega Presiden PBB sereta Chairman BN Sarawak pasal kerejasama tu ke pemanah sereta pemerat nengeri eng- gau rayat kitai.
“Pasal pemerat ngambi pulai baru hak Sarawak ari baruh MA63, nya udah tentu nya batang juluk enggau juluk rasmi perintah nengeri,” ku iya lebuh ditelefon Utusan Borneo, kemari.
Nanta ti mega Kaban parlimen Kapit madah, Sarawak patut nempa kerejasama rat enggau perintah besai ke penguntung enggau pemanah semua rayat.
“Kitai melabaka perintah besai ngembuan pengelurus ati sereta meri kerejasama enggau perintah BN nengeri.
“Tu beguna amat ngagai nengeri enggau rayat Sarawak kelebih agi serata Malaysia,” ku iya.
Ku iya, juluk meri pulai baru hak-hak Sarawak ke m ajak lenyau ari baruh MA63 endang beguna amat ke rayat jemah ila.
Kelimpah ari nya, Hari Empat (Khamis) apin lama, Abang Johari dalam siti penerang berita madahka Perintah BN Sarawak deka terus bekerejasama enggau Perintah Besai baru ke penguntung rayat Sarawak.
Taja pan ba blok penyakal ( BN) Sarawak deka terus nempa kerejasama enggau Perintah Besai ke penguntung rayat Sarawak enggau Malaysia.
“Batang tuju besai kitai iya nya ngulih pulai baru hak Sarawak ti majak lenyau dalam Sempekat Malaysia 1963 enggau Konstitusyen Perinta Besai,” ku Abang Johari.