S4S minta perintah PH meri basa ngagai MA63
KUCHING: GerakanSarawak for Sarawakians(S4S) dekaka perintah baru Pakatan Harapan( PH) meri basa ngagai Sempekat Malaysia 1963(MA63).
Ketuai S4S ke mega aktivis hak mensia mayuh, Peter John Jaban madah PH patut meranka atur merintah bepelasarka MA63 kelebih agi ba Sarawak enggau Sabah.
“Pakatan Harapan udah suah meri semaya diak gempung nya deka meri otonomi sereta mai mayuh agi pemansang ngagai kededua Sarawak enggau Sabah nengah MA63.
“Poster besai kimpin ke ditulis ‘20% oil royalty’ ke nyadi semaya enti PH menang mengkang bediri tegap di mengeri Kuching.
“Diatu sida udah menang asil sukung beribu pengundi Sarawak kelimpah tsunami besai di Semenanjung Malaysia.
“Berindik enggau nya sida meseti ngamatka semaya,’ku Peter John nengah surat penerang berita kemari.
Iya nambah pengari ke baru dipilih tembu Pengawa Bepilih Besai Ke14(PRU14) diatu ngesan tanggungpengawa besai lalu S4S minta sida ngemujur tanggungpengawa nya.
Ku iya, hak Sarawak enggau Sabah ke disetuju dalam MA63 patut dalam rintai pekara ke dulu dikemerat.
“Sepuluh iku pengari rayat Sarawak ke baru ari PH neseti nentuka gempung nya ngamatka semaya sida ba nengeri diri dalam Malaysia baru tu.
“Kelimpah ari nya, 19 iku pengari rayat ari Barisan Nasional(BN) ke udah nyadi penyakal diatu meseti bejalaika tanggungpengawa nagih hak kitai.
“Perintah Sarawak meseti ngadu kaul enggau Perintah Besai ngambi ulih ngintu pemaik 2.7 juta iku peranak Sarawak,’ku iya.
Malaysia diatu ke Peter udah bisi sistem dua parti lalu nempa sejarah ke dikearap ulih ngembing menua tu mansang ke mua nengah atur demokrasi.