Norina Umoi enda putus asa, deka nguji baru dudi ila

KUCHING: Ketuai Parti Keadilan Rakyat( PKR) ke mega chalun Pakatan Harapan(PH) di Sri Aman Norina Umoi nerima pemutus alah ba pengawa bepilih Besai ke14(PRU14)ke baru tembu.

Tajapia, iya madah deka nguji ngerampas penuduk nya ari Barisan Nasional(BN) ba pengawa bepilih ti deka datai.

“Aku nemu kita ngarapka aku menang baka sida Yb Ali Biju baka YB Baru Bian.

“Tang agi mega aku alah, bedau ulih diterima rayat di Sri Aman kelebih agi bala Iban. Bala cina nyauka semua ngundi aku, melayu mayuh nyukung aku tang kitai Iban agi sayauka BN.

“Tajapia aku gaga ketegal Pakatan Harapan udah nempa sejarah menang ba pengawa bepilih besai serak tu lalu numbuhka perintah baru Malaysia,’ku iya nengah seiti surat penerang berita ke dituju ngagai semua penyukung di Sri Aman.

Norina minta diberi seiti agi peluang endur iya mandangka penyiru sereta penyanyau ngagai peranak Sri Aman.

Ku iya, aku keran deka meri servis ngagai rayat ditu, ngintu pengelantang enggau pemaik sida tang peluang nya agi lama ke alai sekeda ari kita engka enda begulai enggau kami agi.

“Sri Aman udah enda dipandang orang agi lalu ketegal nya aku ngarap ulih nyadi pengari kita ditu.

“Madah ngagai dunya diak kitai di Sri Aman bisi orang sakit ti begunaka spital ke menyana. Sekeda nya udah midang ketegal ti kelalu lama nganti.

“Sekeda midang ba pejalai ke spital Kuching tang nadai orang kiruh sekalika kitai di Sri Aman idup tauka mati,’ku iya.

Ketegal nya aku keran deka pengari, nyadaka pinta enggau peneka rayat Sri Aman di parlimen tang aku alah, tandu Norina.

Iya meri jaku terima kasih ngagai semua ke udah mantu iya bekimpin, bala penyukung enggau pengundi.