Nama menteri ke deka ngiring opis menteri diri empu deka dipadahka sehari tu udah aum Kaunsil Presiden Pakatan
KUALA LUMPUR: Perintah Pakatan kemari situ numbuhka kabinet mit ti semina ngundan 10 opis menteri.
Menteri Besai Tun Dr Mahathir Mohamad madah, 10 opis menteri tu iya nya Pekara Wang, Dalam Menua, Penyaga Menua, Pelajar, Menua Pesisir, Ekonomi, Kereja Raya, Perengka Pengangkut, Menua Luar enggau Multimedia, Sains sereta Teknologi.
Sepuluh opis menteri nya patut diisi lengkas, ku iya, maya aum pemberita pengu- dah betuaika aum keterubah perintah Pakatan ke baru digaga pengudah menang Pengawa Bepilih Besai ke-14 (PRU14) kena 9 Mei.
“Kami enggai ngembuan kabinet besai taja pia bisi sekeda opis menteri meseti diisi lengkas,” ku iya.
Sama bisi datai ba aum pemberita tu iya nya empat ketuai parti serakup Pakatan iya nya PPBM, PKR, DAP enggau Amanah.
Iya madah Kaunsil Presiden Pakatan baum keterubah iya kemari lalu berandauka sekeda polisi ke udah disebut dalam manifesto pengawa bepilih Pakatan.
Dr Mahathir ti ngangkat sumpah nyadi Menteri Besai Ketujuh Malaysia malam ensana, madah nama-nama menteri ke deka ngiring opis menteri diri empu deka dipadahka sehari tu (Hari Enam).
Iya madah tu bekau ari aum kemari, genap parti deka baum lalu nentuka opis menteri ni ti dikedeka sida lalu nama chalun sida.
“Tu ukai reti semua perambu sida deka diterima laban sehari kami deka baum penuh nengah kaunsil presiden. Ba kaunsil presiden tu kami deka ngaga pemutus lalu nentuka nama enggau opis menteri ke patut diisi kami.
“Tu ukai reti parti enda ulih beserakup. Kami endang soti parti tang beguna amat semua parti diarika dalam kabinet kami,” ku iya.
Naka tu, ku iya penuduk ke diisi iya nyadi menteri besai enggau Presiden PKR Datuk Seri Dr Wan Azizah Wan Ismail dipadu nyadi Sapit Menteri Besai.
Dr Mahathir nyemetak madah empat parti dalam serakup nya deka bisi tanggungpengawa ke sebaka nadai tau sebarang.
Maya ditanya sekali iya deka megai dua portfolio, chairman Pakatan Harapan nya madah pekara nya deka ditentuka sehari tu.
Nyaut siti tanya sekalika iya deka bepun tama opis Menteri Besai ba Putrajaya kena Hari Satu, Dr Mahathir nyaut: “Tu pekara mit. Ditu pan aku ulih gawa.”
Aum pemberita nya diatur ba Yayasan Al-bukhary ditu. — Bernama
Kami enggai ngembuan kabinet besai taja pia bisi sekeda opis menteri meseti diisi lengkas. Tun Dr Mahathir Mohamad Menteri Besai Malaysia