Padang MDL dikemansang nyadi Limbang Town Square

LIMBANG: Perintah nengeri deka ngemansangka padang Opis Kaunsil Limbang (MDL) nyadi Limbang Town Square ( LTS) nyengkaum ngaga perengka guna paking ke lalu mutarka penanggul paking ke ditapi di mengeri tu.

Menteri Muda Betanam Betupi Dr Abdul Rahman Ismail madah penyampau RM5 juta agih belanja deka diberi dikena ngemansang sitak nya dikena ngaga 40 ngagai 50 lot parking.

Nyadi ku iya penanggul paking patut diperunding sereta diputar kelimpah bejalaika sistem parking bebayar.

“Kitai udah bisi rang undang-undang dikena bejalaika palan paking.

“MDL patut ngagai perambu dikena bejalaika palan parking bebayar enggau sekeda endur di mengeri tu,”ku iya maya dirandau media pengudah bejadika Taba Niaga Night Street Market Opis Kaunsil Limbang ( MDL) apin lama ke udah.

Bela bisi datai Kaban Parlimen Limbang Hasbi Habibollah, ADUN Batu Danau Paulus Palu Gumbang, Ketuai Opis Kaunsil Pellih Limbang (MDL) Kauselor Sufian Mohat, Sekretari MDL Shariman Faizul Abdullah enggau chairman pengatur pengawa Kaunselor Niti Rosli.

ADUN Bukit Kota nya madah sistem parking bebayar nyema dipejalai deka nyeliah mensia mayuh parking kelalu lama.

“Kitai deka sistem tu dipejalai ba sekeda endur dikena nentu mengeri tu pulai ngagai MDL,” ku tandu iya.

Berebak enggau nya, ku iya perintah meha patut ngagai palan paking beringtakat di mengeri tu jemah ila.

Dr Abdul Rahman mega setuju ngambika nama Night Street Market ulih diubah nama ambika chunto dikumbai Limbang Street tauka nama bukai.

Ngelansa pasal Tapak Dagang Night Street Market ku iya digaga nyadi perengka guna ngagai bala pedagang ke majak nambah.

Program nya asil ari penyiru perintah nengeri nengah agih Program Tranformasyen Rama Ekonomi ungkup ubah menua pesisir.

Night Street Market ku iya siti gaya pasar malam ke bisi ba Malaysia, tu nyengkaum pengawa, penerang panchar lampu ke ngujungka Limbang chukup manah dilawa lebih agi ngagai bala temuai ke datai ari Brunei.