Pengawa ngintu rampa menua enggau pengeraja asal tanggungpengawa semua

NIAH: Pengawa ngintu rampa menua enggau pengeraja asal antara pengawa dikemerat ba agenda pemansang di Sarawak.

Tambah mega kenu ku Sekretari Mendam Opis MenteriPemansangMengeri Enggau Pengeraja Asal Dr. Wan Lizozman Wan Omar, pangku pengawa perintah beguna amat nyediaka rampa ti engkeman ungkup pemansang.

“Pengawa ngintu nyadi tanggpengawa kitai begulai sereta gempung kaul deka nyadi meruan agi sereta kreatif enggau kaul bemacham opis enggau ejensi, sektor perintah, sarikat, institusyen pelajar enggau komuniti menua nya,” ku iya nerang.

Iya mansutka jaku nya rambau atur pengawa be- jadika Palan Interpretasyen Niah di Taman Negara Niah, apin lama ke udah.

Sama bisi datai Pemangku Ketuai Pemesai Eksekutif Sarawak Forestry Corporation (SFC) Sdn Bhd Zolkipli Mohamad Aton, Direktor Opis Menteri Dagang Temuai enggau Main Asal Malaysia (MOTAC) Opis Sarawak Suriya Charles Buas enggau Warden Taman Negara Niah Shirley Nathaniel Naning.

Nitih ku Dr. Wan, Pusat Interpretasyen Niah disedia ungkup tuju ngenataika penerang bekaul enggau taman sereta inisiatif ekodagang temuai belalauka komuniti nengah pelasar ti diperansang teknologi, iya nya ari ngusung palan nya dikearap ulih ngasuh sida sedar bekaul enggau pengawa ngintu sereta nambahka penyelai Taman Negara Niah.

“Aku dipadahka palan tu udah dipejalai sereta dilagu enggau kreatif nengah bemacham raban nyengkaum sida ti nero dinding sereta pengawa mandang ti disedia chukup narit ati sereta ngembuan penerang ngagai bala pengusung,” ku iya.

Nya alai ku iya, iya andal amat palan nya deka meri inspirasyen ngagai mensi mayuh bejalaika pangku pengawa besai ngintu pengelain biologi enggau nyukung pengawa nyaga kandang menua ti dijaga terit nya.

Ari raban perintah, ku Dr. Wan pengawa numbuhka palan nya seruran nerima sukung baka pengawa numbuhka Discovery Centre ungkup Taman Negara Mulu enggau Pengawa Ngintu Jelu Siga Semenggoh sereta mega di Similajau, taja teknologi bebida lebuh nya.

Ba lansa bukai, Dr. Wan madahka perintah nengeri meri terima kasih ngagai sukung enggau bantu ti udah diberi raban MOTAC ba pengawa nyikap Taman Negara Niah enggau nyediaka belanja dikena ngemansangka perengka guna sereta ba pengawa ngangkatka sektor dagang temuai di Sarawak.

Nya alai iya dekaka komuniti di menua nya bekerejasama sereta besaup bejalaika pangku pengawa diri empu mantu nyaga enggau ngintu taman negara kitai.