Karnival Usahawan Desa@Kapit 2018 pelasar alai pedagang ngelaku produk
KAPIT: Karnival Usahawan Desa@Kapit 2018 (KUD@ Kapit) nyendiaka awak enggau pelasar ngagai pedagang menua tu mantaika produk sida, pia ku Kaban Parlimen Kapit Datuk Alexander Nanta Linggi, lemai Hari Enam tu tadi, lebuh bejadi pengawa nutup program dua hari berunggu ti diatur di laman Fort Sylvia enggau Jalai Kubu Lama ditu.
“Program KUD@ Kapit 2018 tu meri awak sereta nempa pelasar ngagai pedagang menua tu mantaika produk sida. Asil ari produk, kraf jari sereta mega utai pakai menua tu ulih dijual dikena ngulihka belanja.
“Taja ba perati aku bisi penekul baka nyual produk ngagai makit besai agi di luar Kapit, tambah mega bisi pengelemi kelebih agi ari tungkus produk sida. Nya alai, kitai ngandalka saup ari KUD ti ngaul raban Majlis Amanah Rakyat ( MARA) sereta ejensi bukai di baruh KKLW, bisi program diatur mantu pedagang menua pesisir ngambika bisi kualiti sereta diterima dalam makit kelimpah nambahka rega produk,” ku Nanta.
Ku Nanta, batang ruju program tu deka ngelakuka pengawa dagang ngagai peranak menua pesisir kelebih agi di Kapit, kelimpah meri penerang enggau bansa bantu ti patut dipinta lalu ari raban ni nyengkaum bantu belanja ari bemacham ejensi.
Bisi 50 buah bansal udah didiri ti bejualka mayuh bansa produk ari utai pakai, kek, produk asil kebun, kraf jari ari manik, pua kumbu, barang lama, tepa, sereta mayuh ke bukai nyerumba atur KUD@ Kapit dua hari berunggu ti mujur matak pedagang ari Kapit sereta ari luar.
Bala pedagang ngerebut awak disediaka KUD@ Kapit dikena ngelakuka penyelai produk sida. Mayuh sida teulihka penguntung ari mayuh bansa kus enggau workshop ti diatur Giat MARA lalu nerima bantu belanja ( dikena ngepunka dagang) ari Majlis Amanah Rakyat ( MARA). KKLW mega bisi ngagihka belanja besai dikena ngenegapka pedagang datai ari raban graduet sereta pedagang bepengulih ngambika chakah ngaul diri dalam dagang, ari ngiga kereja. Nengah dagang bulih mayuh untung.
Ba atur program nya, Nanta bisi nyuaka bantu Program Perumahan Rakyat Termiskin ( PPRT), Program Peningkatan pendapatan ( PPP), Pinjaman SPED NANO sereta mega perais chabut tikit benasit.
Pemantu Ketuai Skretari KKLW Hajah Norisan Ramli, Sapit Ketuai Sekretari Perintah Nengeri Sarawak Datu Samion, Residen Kapit Joseph Belayong antara urung 1500 iku bala ke bisi datai nedat program nya.